L’autor coruñés Manuel Álvarez Torneiro fue galardonáu col Premiu Nacional de Poesía 2013 pola so obra Os Ángulos de Brasa. Concedíu pol Ministeriu d’Educación, Cultura y Deporte, esti galardón ta dotáu con 20 mil euros.

El Premiu Nacional de les Lletres Españoles, na so modalidá de poesía, distingue’l conxuntu del llabor lliterariu, en cualaquier de les llingües oficiales españoles –polo que nun pue concedese a nengún autor n’asturianu-, nesti casu a un autor en llingua gallega –colo que sí podría concedese a un autor asturianu, pero qu’escribiera na variante galle del occidente d’Asturies o en castellanu.

El xuráu d’esti galardón presidólu María Teresa Lizaranzu, como directora xeneral de Política ya Industries Culturtales y del Llibru, exerciendo como vicepresidenta la subdirectora xeneral de Promoción del Llibru, la Llectura y les Lletres Españoles, Mónica Fernández Muñoz.

Ente los sos vocales tuvieron Inés Fernández-Ordóñez, Basilio Losada Castro, Amaia Jauregizar, Susanna Rafart i Corominas, María Isabel López Martínes, Juan Ángel Juristo González, Juan José Lanz, Ramón Sánchez-Ocaña Serrano, María Ángeles Egido León y Jaime Siles Ruiz. Esti xuráu completáronlu los dos últimos galardonaos col Premiu Nacional de Poesía, Antonio Carvajal Milena (2012) y Francisca Aguirre Benito (2011). De secretaria exerció la xefa del Serviciu de Promoción de les Lletres de la subdirección xeneral de Promoción del Llibru, Alicia García Molina, qu’actuó con voz pero ensin votu.