Por Ismael González Arias.- Va años, por mor d’un retrasu y posterior cancelación d’un vuelu, lleváronnos mui amablemente a los participantes nun congresu a una sala acondicionada d’espera. Empleo’l términu acondicionada nel sentíu nel que los psicólogos y los diseñadores d’espacios cuiden tien de ser un espaciu nel que soportar l’angustia de la tensión. Colores suaves, alredor del crema cálidu. Lluz amatada, a xuegu cola calidez del color. Arume intensu a café y a flores seques. Música que nun llama enxamás a sentila, pero que sabes que tá ehí namás si faltara.

Enxamás esistió esti tipu de música hasta los nuestros díes. Hasta convertise anguañu nuna constancia. Música que t’acompaña na soledá del aparcamientu de los grandes almacenes. Música cola que subes nel ascensor nel ne namás sube contigo la propia imaxe del espeyu. Música a lo llargo de los diferentes niveles d’espacios dedicaos a ropa, a menaxe, a regalos. Música que te sigue pela cai nos tiempos declaraos de festividá dedicada al comerciu. Música nel muséu que visites, na exposición na qu’entres, na sala d’espera del dentista. Música nel chigre nel qu’almuerces, nel restorán rápidu nel que comes de piés, nel pub nel que tomes la última copa.

Aquel día, el del restrasu del avión y el de la sala d’espera enllena de xente con bien de ganes de volver pa casa depués de tres sesiones más qu’aburríes d’un congresu de ciudaes peatonales, tiráu nel sofá crema, con una taza de café americanu na mano y faciendo por ordenar los pensamientos de qué facer na cabeza, sentí de fondo la banda sonora de la película Blade Runner, de Vangelis.

Cuidé que yera la primera vez que cayía nel suficiente gradu d’atención como pa decatame de qué música taba sonando. La primer vez nel que me paraba a sentir una música que tien de función la de tar sonando de fondo pa que nun se-y preste nengún gradu d’atención. Un música, les más de les veces, compuesta pa otra función y que’l diseñu de sonorización d’espacios públicos acabó topando como afayaíza pa tar al nivel de la lluz ambiental y de lo colores cálidos.

Lo dafecho importante d’esa música ye que nun llegues a sentila, sabiendo que ta presente. Porque, de llegar a reconocela, d’adquirir presencia, dexaría de cumplir la función pa la que fue programada. D’ehí que la perdiera la de Vangelis de la que supe que yera Vangelis. D’ehí que la perdiera la de Lucas 15 –como comenté notru artículu de depués del branu pasáu- namás qu’alvertí que se trataba de “Salir moces a bailar” del so discu.

Nun fin de selmana d’estos d’atrás alcontré na llibrería del Muséu Reina Sofía un llibru que me daba esplicación de la importancia d’esta música. El llibru titúlase La música que no se escucha y ye’l resultáu d’una serie de conferencies daes por especialistes na materia dientro del Sexto Festival de Arte Sonoro Zeppelin, nel añu 2003, en Barcelona.

Un trabayu que pide atención pa con una música que nun te llama a ello, esa música que suena de la que tamos ocupapos en dalguna otra actividá y que ye la dueña del ambiente de cais y places, tresportes, supermercaos, cases, restoranes, tindes de moda y non tan de moda, entornos de trabayu, llugares p´ñublicos y menos públicos. Llugares nos que suenen músiques d’una y  otra especie, y que bien de veces fueron compuestes orixinalmente pa ser sentíes nun entornu d’atención.

El subtítulu del llibru ye Aproximaciones a la escucha ambiental. Un apunte esplicativu nel sentíu nel que van dirixise los autores reflexaos nel testu, que piden una llamada d’atención sobre eses músiqes d’ambiente, sobre esa especie de ruíu de fondo. Una toque d’atención sobre’l fechu de qu’esta actitú d’escucha distrayida y intermitente tiense convertío nuna norma: en dalgo que llamen los espertos “escucha ambiental”.

Ente los diferentes artículos, Franco Fabbri critica los prexuicios musicolóxicos qu’anguañu impiden una averamientu rigurosu a estes esperiencies d’escucha –dedicando un apartáu al usu de música de fondo demientres se fai l’amor-. Nel artículu de Jonathan Sterne fálase de cómo los programadores son absolutamente conscientes de qué música se tien de programar en cada momentu y llugar. Josep Martí dedica’l so artículu a reflexonar sobre la música de fondo tradicional,  nel sentíu de ser la música que de siempre se vien sintiendo nel ámbitu de les fiestes patronales. Al que lu sigue otru d’Anahid Kassabian sobre la world music y la esistencia d’un turismu auditivu a partir del simple fechu de tomar un café nun Starbucks o comprar en Putumayo.

Ciérrase’l llibru con un artículu de Marta García Quiñones sobre la programación de música clásica na radio pal oyente distrayíu y otru d’Ola Stockfelt –que ye en bona midida l’orixen d’esti artículu míu- nel que fala, ente otres munches músiques, de la banda sonora de Blade Runner, p’amosar como los bonos compositores xueguen coles fronteres tenues ente la música pa ser sentida y la música que flota nel ambiente.