El Coordinador Xeneral d'IX d'Asturies, Jesús Iglesias, considera que colos últimos nomamientos fechos públicos pol presidente del Principáu, Francisco Álvarez-Cascos, viose qu'ésti inclinose por crear un Gobiernu "sandwich" nel que nengún de los sos integrantes pueda face-y solombra

El tamién voceru d'IX nel Parlamentu asturianu declaró que, cola primer riestra de nomamientos de conseyeros, Cascos buscaba una imaxe similar a la de los últimos gobiernos del franquismu, "nos que se primaba la formación académica y l'especialización".

Cola segunda tacada de nomamientos de viceconseyeros, Iglesias cree que'l presidente asturianu xunió al "Gobiernu de los López" otra característica, la de crear un Gobiernu "sandwich" nel que'l perfil políticu marcalu él.

Asina, afirmó que Cascos "nun tien la parte de riba a naide con una identidá política que pueda xenerar conflictu dalgunu, y pembaxo punxo a viceconseyeros con trayectories bien venceyaes a la derecha asturiana, a la derecha de siempre".

Iglesias incidió en que Cascos blindose perembaxo y penriba" con un equipu que da la impresión de formar un Gobiernu de "conseyeros funxibles", que se van a consumir col usu.

Tamién dixo qu'IX va años que fala d'Asturies como país, pero que la visión d'esta formación y la d'Álvarez-Cascos respuende a distintos allugamientos ideolóxicos.

"El país ástur qu'IX pretende construyir nun tien enforma que ver cola Asturies del retrovisor que busca los sos referentes nel sieglu XVIII y los ilustraos", señaló Iglesias, antes de precisar qu'a cencielles col arguyu de ser asturianu nin se crea empléu nin se caltienen sistemes de sanidá o educativos calidables.