Por Ismael González Arias.- Dende primeros de sieglu vien anunciándose la inminencia de la fin de la tonada. Eduardo Martínez Torner convoca’l primer gran concursu de canción asturiana, con motivu de les fiestes de San Matéu de 1922, mentando la espada de Damocles qu’amiya sobre la música tradicional en xeneral y sobre la tonada asturiana en particular. A lo llargo del sieglu nun hai década na que dalgún ilustre haxógrafu apunte’l posible epitafiu del xéneru.

En xeneral, la tendencia al catastrofismu de lo propio, la especial predisposición al apocalipsis cultural de tolo asturiano, ye dalgo consustancial a la nuestra particular forma de ser. En Les Noticies de la selmana pasada yo mesmo tiendo al catastrofismu militante al dar l’anuncia de la muerte de l’ayerana. Poques páxines enantes, Alberto Peña apunta hacia la muerte de la cultura asturiana y pon-y fecha: cuatro años.

Tien de ser cierto que llevo tantes veces escribiendo contra esta especial predisposición anímica asturiana que tuvieron d’alvirtilo tres llectores y asina me lo comentaron al traviés del email. De nada sirve que diga na mio defensa qu’en nengún momentu de la que diba escribiendo l’artículu cayí na cuenta de que taba incurriendo nel erru sobre’l que tantes veces opinara.

Retomo, pues, l’artículu de la selmana pasada, nel que pronosticaba la muerte de l’ayerana, el xéneru más identificativu de la música vocal de la zona d’Ayer. Lléolu con calma. Certifico’l negativismu xeneral del tonu. De nada sirve que diga que, puesto que conozo’l tema, ye normal la mio postura negativista.

El negativismu cultural siempre ye una postura falsa. Como lo ye’l positivismu. Lo mío ye una opinión. Siempre se trata d’una opinión, cuando se fala d’estos temes. Los datos puen ser los datos. La valoración que d’ellos se saque siempre va ser subxetiva. Mesmo, los datos, enxamás son obxetivos.

Insisto: malapenes queden nesti momentu cinco cantadores de tonada ayerana que puean defendela con dignidá sobre un escenariu. Continúo: nengún d’estos cantadores tien menos de cincuenta años. Inda más: nun se da presencia nenguna de l’ayerana nos concursos nin nos festivales de tonada qu’hai n’Asturies, nos últimos años. Con too, inferir d’estos datos la inminencia de la muerte d’esti xéneru nun dexa de ser más que la mio opinión. Una opinión gratuita.

Los presentadores de los concursos de tonada siempre fueron los más grandes especialistes na oratoria victimista. Los qu’a sí mesmos s’erixeron nos grandes baluartes defensivos de la tradición resultaron tamién ser los más grandes apólogos de la inminencia del fin. La cultura musical asturiana vien dando los aboquíos, según los sos discursos, década a década nos últimos ciento cincuenta años. La cultura asturiana, en xeneral, lleva años morriendo, da lo mesmo que’l que fale lo faiga de la llingua asturiana que de la gaita.

Depués, la realidá amuesa tolo contrario. Enxamás contó la llingua asturiana con mayor númberu d’escritores. Enxamás tuvo la gaita tal númberu d’instrumentistes.

Siento nun poder dicir lo mesmo de l’ayerana. Pero, el tiempu tendrá de decidir sobre’l tema. Y, mirando hacia atrás, si nel añu 80 escribiera un artículu sobre’l futuru de la gaita o de los escritores en llingua asturiana, nin na más positivista de les visiones afayaría un escenariu como l’actual.

La cultura asturiana siempre va ser la propia del tiempu y del llugar. El resto ye materia d’estudiu de l’antropoloxía hestórica. Y de materia expositiva nos museos. La cultura ye dalgo vivo. Si l’ayerana tien de desaparecer ye porque perdió’l so sentíu cultural nesti tiempu y nesti llugar. Si tien de siguir viviendo ye porque lu sigue teniendo. Les opiniones que vaticinen el final, empezando pola mía, siempre van ser gratuites.