Esti miércoles que vien, 16 d’ochobre, va tener llugar nel Niemeyer d’Avilés la conferencia de Gonzalo Fanjul, premiu FAO 2012 pol so llabor divulgativu sobre la probleza, organizao cpor mor de les xornaes qu’entamen sobre la fame y la malnutrición n’Asturies, organizaes pola Alianza Nacional contra la Fame y la Malnutricón d’España (ACHM-E).

L’ACHM-E, na so primera actuación, va cellebrar esti alcuentru pa fomentar el conocimientu, la reflexón y el debate sobre la fame y la malnutrición nel nuestru país. Al tratase d’un problema determináu por causes y realidaes heteroxenes, prevése un análisis dende perspectives estremaes pero complementaries, col obxetu de conocer los datos qu’anguañu tan siendo valoraos dende l’ámbitu de la epidemioloxía, la clínica pediátrica, la socioloxía de l’alimentación y les entidaes sociales que presenten servicios d’axuda a collectivos vulnerables.

Nel mes de payares de 2012, la Fundación Bancu d’Alimentos d’Asturies, en xunto con otres organizaciones d’índole públicu como priváu (Fundación Alimerka, Conseyería de Bienestar Social del Principáu d’Asturies, al traviés de l’Axencia de Cooperación, Ayuntamientu d’Uviéu, Ayuntamientu de Xixón, Ayuntamientu d’Avilés, Rede Asturiana de Desarrollu Rural, Xunión de Cooperatives Agraries del Principáu d’Asturies y Universidá d’Uviéu, qu’ostenta la presidencia), constituyeron l’Alianza Nacional contra la Fame y la Malnutrición n’España.

L’obxetu d’esta Alianza ye la de llevar al acabu una rede d’apoyu n’España a la ACHM (Alianza contra la Fame y la Malnutrición), promovida pola Axencia Internacional sobre Alimentación y Agricultura (FAO), el Fondu Internacional de Desarrollu Agrícola (FIDA), el Programa Mundial d’Alimentos (PMA) y la Organización Biodiversity International, arriendes d’una serie d’organizaciones internacionales llíderes y organizaciones de la sociedá civil comprometíes pa finar cola fame y la malnutrición mundial.