Avilés.- Como si d’una alegoría del circu de mentires y medies verdaes texíes alredor del Centru Niemeyer se tratara, prográmase nesti auditoriu’l musical Pinocho, espectáculu galardonáu nos Premios Max 2011 como “Meyor Espectáculu Infantil”.

Más d’ochenta mil espectadores, neños y mayores, yá averaron a la maxía d’esti cuentu inmortal y disfrutaron de les voces en rigurosu directu de los actores d’esta compañía. Amás de vivir les emocionantes aventures d’esti títere de madera que naguaba por convetise nun neñu de carne y güesu, un sueñu qu’acaba somorguiando a tolos espectadores y que convierte a esti espectáculu nuna cita imprescindible del calendariu del ‘ochobre teatral asturianu.

Una oportunidá de disfrutar en familia, al delláu de los más pequeños de la casa, del maravillosu mundu del musical, con una gran obra que ponen n’escena un escoyíu númberu de profesionales.