Ismael González Arias.- José Noriega dexóla grabada na versión de referencia pa los cantadores de les siguientes xeneraciones. Hasta’l puntu que falar de Noriega yera facelo de la so tonada de más grande sonadía, “Hai una llinia trazada”. Depués, pa la xente más mozo, de les xeneraciones que se suben al escenariu pela vez primera a finales de los noventa y na primer década del sieglu XXI, la versión de José Luis Fernández, El Ruiseñor de Llangréu, tamién tien los sos siguidores.

Asina lo fai constar nos créitos del so primer discu en solitariu la cantadora Marisa Valle Roso, coles siguientes palabres: “José Noriega y José Luis Fernández, El Ruiseñor de Llangréu, fueron, ente otros, cantantes que ficieron patrones de referencia d’esta tonada, que combina aspectos de pura bravura con interesantes dibuxos melódicos”.

Como la más grande parte de les tonaes, “Hai una llinia trazada” consta de dos cuartetes. La primera, la que fala propiamente d’esa llinia trazada y, la segunda, la que cumple les funciones d’estribillu o coda y que polo xeneral nun guarda nenguna relación cola primera. Nesta ocasión, nesta segunda estrofa la relación establezse namás refiriendo a pueblos de la cuenca minera. Y diz asina: “Tien Sama’l ríu Nalón / La Felguera tien a Lada / en Olloniego’l puentín / y en Mieres La Rebollada”.

Enxamás presté especial atención a lo que contaba esta tonada na so primera estrofa hasta que l’arquitecta italiana Valentina Rocco y el músicu y fotógrafu, tamién italianu, Antonio Mercurio, faláronme d’ella por mor de facer un videoclip del CD De lo fondero l’alma de la citada Marisa Valle Roso. La lletra d’esta primera estrofa diz:  “Hai una llinia trazada / Samartín del Rei Aurelio / hai una llinia trazada / pasa por Lieres arriba / y atraviesa La Collada”.

La hestoria a la que refier esta estrofa vien d’atrás. Per un llau, el 15 de xunetu de 1892 otorgóse a Enrique Borrell la concesión d’un ferrocarril de vía estrecha dende Lieres, conceyu de Siero, hasta’l puertu d’El Musel en Xixón. Y, per otru, el 8 de febreru de 1901 otórgase a la Sociedá de Créitu Xixonés la concesión pa la construcción y esplotación d’otru ferrocarril de vía estrecha dende Lieres a Samartín del Rei Aurelio. Per último. el 8 de xunu de 1901 constitúise en Xixón, con un capital social de seis millones y medio de pesetes repartíes en trece mil acciones, la Sociedá Ferrocarriles de Samartín del Rei Aurelio a Lieres, Xixón y El Musel, filial de la Sociedá de Créitu Xixonés y depositaria de la concesión ostentada por Enrique Borrell. Según consta nel trabayu fechu sobre esti ferrocarril por Carlos Roces Felgueroso y tituláu El puerto de El Musel y el Muelle de Gijón, en relación con el desarrollo de los ferrocarriles mineros.

Esti proyectu permitía enllazar a esti ferrocarril col de Llangréu, en Lieres cola Compañía de Ferrocarriles Económicos y en El Musel col Ferrocarril de Carreñu. Pero, posibles problemes na planificación de les obres y bien de dificultaes de financiación ficieron que’l proyectu, una vez empezáu, nun llegara a bon términu. Les primeres demandes por impagos contra la compañía upáronse en 1910 y prosiguieron hasta que, por Real Orden de 21 de setiembre de 1916, declaróse oficialmente la quiebra de la sociedá. Depués, el 22 de xunu de 1922, otra Real Orden declaraba caducaes les concesiones realizaes en 1892 y 1901.

La llinia trazada quedó, asina, neso: la caxa en bien de partes d’un ferrocarril que nun llegó a funcionar enxamás. Arriendes de la tonada, queda de la so memoria dellos túneles de pasu de Samartín del Rei Aurelio a Bimenes, dos pontes riba’l ríu Nora en Sariegu y dellos túneles más en más, ente ello el de les Cuadrielles de más d’un kilómetru de llargu.

Años más tarde, en 1949, inauguróse’l ramal de vía estrecha Veriña-La Camocha qu’aprovechaba parte del trazáu. Tuvo en funcionamientu hasta 1986 y agora úsase como Vía Verde, como dellos otros tramos n’otros conceyos.

Con too, amás de poder siguir el rastru d’esti ferrocarril na tonada, tamién pue siguise en bien d’otros materiales. Asina, los reloxes de les estaciones yeren encargaos a la Reoloxería Suiza, d’Uviéu, los vagones a Compagnie Centrale de Construction, de Bélxica, y les locomotores a la North British Locomotive Company. Como tamién cuenta’l trabayu del profesor de la Universidá d’Uviéu Faustino Suárez Antuña, tituláu La Compañía de los ferrocarriles de San Martin-Lieres-Gijón-El Musel. Aproximación geográfica y un estado sobre la cuestión.