Mieres.-Esti sábadu, 5 d’ochobre, tuvo llugar en Turón, conceyu de Mieres, la xornada d’alcordanza de los que dieron la so vida na defensa de les llibertaes y xacen enterraos nes coraes del Pozu Fortuna. Esti pozu sigue teniendo nesta cuenca’l macabru honor de ser ún de los símbolos de la represión, yá que nel fueron tiraos, vivos y muertos, alredor de 300 persones. Inda güei esisten testigos vivos d’esta masacre, na que fuera represaliáu, ente tantos otros, el güelu de Javier Fernández, anguañu presidente del Principáu d’Asturies.

Nel actu intervinieron Víctor Luis Álvarez, vicepresidente del Foru Pozu Fortuna, Guillermo Rendueles, médicu psiquiatra, Jesús Iglesias, senador d’Izquierda Xunida, Diego Fernández, conceyal de Memoria Hestórica de Mieres, y el galardonáu col “Pozu Fortuna” d’esta edición, el sociólogu Vicenç Navarro. Al cierre de los actos intervino, como n’ediciones anteriores, la Banda Música de Mieres interpretando l’Himnu  de Riego.

Son bien d’otros los llugares del conceyu de Mieres que guarden la memoria d’esta represión, como’l patiu del Colexu La Salle, el Llanu la Tabla o los montes d’Urbiés, como tamién se fala d’enterramientis na Peña Regá, nel Picu Siana y na Güeria de San Xuan. Lo que fai, en xunto, a les cuenques como ún de los llugares d’España onde más de cebó la represión.

Asina, otra de les zones bien castigaes fueron los conceyos d’Ayer y L.lena. Na nomada fosa de Felechosa, nel Altu Ayer, xaz enterrada una neña de 15 años que, según se sigue contando, reconoció al so pasrín ente los asesinos. Nesa fosa podría haber ente 25 y 35 persones. A tolos llargo de la carretera del puertu San Isidru tiense constancia de bien de foses.

Na más aplaudida de les intervenciones, la del profesor Navarro, resaltóse la necesidá de siguir lluchando contra la presencia de vestixios del franquismu, como’l monumentu que na plaza España d’Uviéu sigue honrando al dictador.