El tema del celtismu cultural asturianu yá fuera tratáu dende facía años por diferentes autores. En música tuvieron gran trescendencia delles deles tesis defendíes por Benito Álvarez-Buylla nel so llibru “La canción asturiana”. Pero ye a partir de la transición democrática cuando arraiga nel ámbiu de los músicos asturianos, principalmente nos viculaos al folk y a la música de gaita. Esti celtismu nun enraigonó, por exemplu, nel ámbitu de la canción asturiana, el de mayor desarrollu naquellos años. La influencia de la música bretona, en primer términu, al traviés del descomanáu ésitu d’Alan Stivell y de grupos como Gwendal, y de la música irlandesa y escocesa, emprimó a facese notar nel propiu tratamientu que los músicos apienzaron a dar a los temes tradicionales.

Una de les persones claves pa entender el fenómenu del celtismu n’Asturies ye Lisardo Lombardía, organizador de la Nueche Celta d’Uviéu d’aquel mesmu añu1983, como parte del programa de les fiestes de San Matéu. Tratábase nesti casu d’un proyectu enforma más ambiciosu que la organización d’un festival de música, yá qu’incorporaba un ampliu programa de conferencies, talleres y actividaes diverses, como exposiciones, proyecciones, cursos…

La trescendencia de Lisardo Lombardía como productor musical anicia tamién nel mesmu añu cola edición d’una grabación en directu, “Folklore Astur”, que sigue siendo una maravía etnomusicolóxica. Surdiera como resultáu de les intervenciones d’un bon númberu de músicos tradicionales asturianos dientro del marcu de la II Muestra de Folklore Astur. La grabación, sobre un fondu fotográficu del paisaxe de les brañes, inclúi verderes xoyes de la música asturiana, como’l “Corri corri”, el “Pericote”, la “Danza de San Xuan”, el “Son d’Arriba”, la “Lluita”, las garruchas de pandeiru y de curdión, el “Regondixu”, les jotes de Tresmonte, L.laciana, Cangas y de Centru, el valse de rabel, el fandangu punteáu o l’entemediu de misa conocíu como “Marcha celta” (con esti nome la popularizara’l gaiteru Manolo Quirós, por más que llevara tola vida empleándose como entemediu de les mises de Teberga y los alredores, per parte de los gaiteros tradicionales).

Dende entós, el trabayu particular de Lisardo Lombardía, y el realizáu en xunto al Conceyu d’Estudios Etnográficos Belenos, va tener una gran trescendencia en tola música y la cultura asturiana del momentu, vinculada a lo celta.