Ismael González Arias.- Si l’asturianada ye’l xéneru más identificativu de la música vocal asturiana, l’ayerana ye la so más grande espresión. Nun se trata d’una modalidá de tonada sinon d’un xéneru propiu, d’una manera dafechamente definida d’interpretar la tonada: podría falase, asina, de que n’Asturies conviven la tonada asturiana y la tonada ayerana.

La tonada asturiana caracterízase pola bayura de los sos melismes (les vueltes o vueltiquines, como les nomen los sos intérpretes); esta bayura, llevada al estremu de la resistencia de la voz na so respiración, distingue dafecho la tonada ayerana.

El nome d’ayerana vien-y del conceyu d’Ayer, d’onde se considera orixinaria y d’onde fueron los sos más grandes intérpretes; con too y que delles de les sos característiques influyeron na manera d’interpretar de dellos cantadores de tonada asturiana y dellos delos sos cantares sintiéronse na voz d’otros intérpretes ayenos al conceyu.

El númberu de cantadores de tonada asturiana mantiénse estable dende primeros de sieglu y, nos últimos años, una nueva xeneración de voces moces ta dando’l relevu y renovando’l so repertoriu. Esti fenómenu de la renovación nun se ta dando na tonada ayerana, onde la edá avanzada de los sos intérpretes ta llevando a la desparición d’esti xéneru; al nun incluyise, por exemplu, el so usu nos concursos, y al nun contar con nengún festival propiu nel que sentila.

L’ayerana podría considerase, por too ello, la más grande espresión de la canción tradicional asturiana, pol so gradu estremu de dificultá y pola bayura melismática de la so llinia melódica. Dellos de los sos cantadores tradicionales siguen consideraos ente los más grandes intérpretes de la canción asturiana y siguen na memoria colectiva los sos nomes: Santos Bandera, José Requejo, Ataulfo Lada Camblor, Veneranda Fernández, José Caleya, Vítor el de Boo, Tonín de Nembra, Carlitos el de Murias… L’ayerana guarda na so lletra y na so melodía l’alma de la xente d’esta tierra. Sedría una catástrofe pa la nuestra cultura musical que llegara a perdese.