Lo normal sedría pensar que si’l propiu Rimsky-Korsakov dexó escrito nes sos memories que les partitures orixinales del so Capricho Español salieran del cancioneru armonizáu Ecos de España, del músicu madrileñu José Inzenga, nadie tendría de cuestionar el fechu. Asina lo cuenta nel so llibru Crónicas de mi vida musical: “Los temes españoles, más que nada de carácter danzante, proporcionáronme ricos materiales pa consiguir efectos orquestales variaos”.

José Inzenga naciera en Madrid en 1828 y considérase ún de los músicos precursores del Nacionalismu musical polos sos trabayos de recopilación de materiales folclóricos, armonizaos posteriormente pa piano al estilu de la época. A mediaos de sieglu XVIII emprimó la carrera de compositor con una serie de zarzueles pero, na década de los setenta, abandonó la composición pa dedicase d’afechu al estudiu del folclor musical d’España. Asina, cola publicación de Ecos de España (1873) empieza un ampliu trabayu de recoyida de materiales de campu per tola península qu’incluye Asturies. Por más que sigue nesta recopilación los patrones decimonónicos, alviértense delles novedaes nel tratamientu de los cantares.

Inzenga ye’l primeru de la so xeneración en teorizar que nun podría escribise la hestoria de la música española dexando de lláu la bayura del so folclor musical. Les sos palabres na Introducción a la so obra marquen l’obxetivu de “salvar pa siempre de l’acción devastadora del tiempu una de les más importantes manifestaciones de la nuestra propia nacionalidá”.

Y, magar de la realidá apuntada más arriba del propiu comentariu de Rimsky-Korsakov, n’Asturies apuntóse la teoría de que les melodíes asturianes del so Capricho Español podríen venir d’una relación epistolar col compositor asturianu Anselmo González del Valle. Una correspondencia de la que nun queda nenguna constancia.

Del Valle, arriendes de compositor, fuera un gran colleccionista de partitures musicales de tolos xéneros musicales que se veníen produciendo naquellos finales de sieglu XIX y primeros del XX. Una biblioteca musical que fue considera nel tiempu una de les más importantes d’España. Y tola relación posible con Rimsky-Korsakov recuéyela’l diariu El Carbayón, de febreru de 1895, cuando señala que la partitura del Capricho Español interpretada pola Sociedad de Conciertos de Madrid fuera a partir d’una donación d’él.

El Capricho Español, Suite para Orquesta Op. 34, consta de cinco partes y, d’elles, cuatro surden de melodíes asturianes. El primer movimientu recuerda la Obertura de Carmen, de Bizet, pol aire d’alegre abadía de danza. Nel orixen ye una cenciella alborada de gaita de les qu’anima a la xente a upase de la cama en tiempu de fiesta. Vuelve a esta melodía nel tercer movimientu, pero cambiando la instrumentación, y recupérala al final, detrás d’otra melodía de gaita: la d’un fandangu asturianu encadenáu ensin interrupción a un fandangu andaluz.

El segundu movimientu ye una melodía de danza prima interpretada a la manera d’una tonada asturiana y espuesta poles trompes y repitida de siguío poles cuerdes, el cornu inglés, con répliques de les trompes y otra vuelta coles maderes, les trompes y la cuerda, y al final acompañada de diversos contrapuntos. La conclusión efectúase sobre una llarga escala cromática de la flauta.

Colo que s’entiende qu’una obra d’esencia tan asturiana llame a crear una lleenda alredor d’ella, tovía más allá de la propia de llegar a pensar nuna relación ente los compositores rusu y asturianu. Esta lleenda fala de la supuesta estancia de Rimsky-Korsakov n’Asturies y sobre la que nun esiste -aporfien una y otra vez los estudiosos del tema-, nenguna base documental.

Con too, a pie de cai, la estensión d’esta lleenda ye enorma nel conceyu de Llangréu, onde se cuenta que tuviera en La Felguera acompañando a Pedro Duro, aselando del mundanal ruíu. Dos fechos sustenten esta afirmación: esiste un himnu de La Felguera compuestu por él y una casa que sigue nomándose “la casa de Rimsky”, como testimoniu de que fuera onde vivió una pequeña temporada ensin querer saber nada del entornu musical. Esta casa, tamién conocida como palaciu de Villa, atópase en Riaño, y nella nació la madre de Pedro Calderón de la Barca, Ana María Henao y Riaño.

Y, claro, l’entornu musical, que yera Uviéu, enteróse cuando yá yera tarde y Rimsky-Korsakov marchara ensin que-y pudieran rendir pleitesía los ilustres filarmónicos de Vetusta.