Asturies.-Coincidiendo la festividá de los Santos Ánxeles Custodios, patronos de la Policía, el Cuerpu Nacional fizo públiques les cifres porcentuales de delitos n’Asturies, nos que llama l’atención la estabilidá con respesto a los datos del añu pasáu, yá de por sí baxos, lo que convierte a la nuestra Comunidá nuna de les más segures del Estáu. La media de 28 delitos per cada mil habitantes conviértela na segunda más baxa d’España.

Con too, llama l’atención l’aumento d’un 10% nel conceyu d’Avilés, frente a un descensu del 5’5% nel de Mieres.. Les cifres de Mieres conviértense n’hestóriques porque enxamás fuera tan baxu’l númberu de denuncies presentaes ante la Policía, por más que nos primeros meses del añu diérase un aumentu de les cifres con respecto a les del añu anterior por mor de los delitos cometíos por un grupu reducíu de delicuentes que fueron llocalizaos aína.

N’Asturies, a pesar d’esta baxada de datos, alviértese un aumentu considerable de les denuncies falses rellacionaes col robu de teléfonos móviles col aquel de poder cobrar el seguru. Un datu que ponía de manifiestu’l xefe de la Comisaría de Mieres nel discursu pronunciáu nel salón d’actos del Casinu, llugar nel que se cellebró la festividá.

Resáltase n’Asturies la baxada de delitos graves. Per otra parte, la Policía de Les Cuenques alvierte del númberu de robos rellacionaos col cobre. Nesti sentíu llama l’atención los robos vinculaos al expoliu de los monumentos urbanos, de los que se sustrái les pieces de metal pa vendeles posteriormente.