Nel últimu minutu d’antayeri cumplióse’l plazu pa evitar una parálisis del gobiernu de los USA, ante la falta d’alcuerdos nel Congresu dende ayeri dependencies gubernamentales alcuéntrense en cierre parcial.

¿Qué ta pasando?

L’añu fiscal de los USA entama el 1 d’ochobre, polo que ye mester tener un presupuestu aprebáu enantes de’sta fecha, lo que diba permitir el funcionamientu del gobiernu. El Congresu pue nun aprebar esti presupuestu, pero pue mantener al gobiernu funcionando mediante l’aprobación de midies extraordinaries.

¿Por qué nun s’aprebó’l presupuestu?

El Congresu confórmase del Senáu, controláu polos Demócrates, el partíu d’Obama; y la Cámara de Representantes, controlada polos Republicanos. Estos, faciendo usu de la so mayoría aprebaron un plan presupuestariu que nun incluyía fondos pa financiar el programa Obamacare qu’entró’l 1 d’ochobre el vigor.

¿Qué ye Obamacare?

El nome que se-y da a la Llei d’Asistencia Asequible, una extensión del serviciu de salú. La llei permite a aquellos que nun tienen seguru médicu obtener ún subsidiáu pol gobiernu.

¿Pudo evitase esta paralización del gobiernu?

Intentólo’l republicanu John Boehner con una propuesta que pretendía aprebar un presupuestu ensin condiciones que mantuviera al gobiernu funcionando y abordar l’asuntu Obamacare nel debate del alza del techu d’endeldamientu que diba cellebrase nos díes vinientes. Con too, la negativa del Tea Party llevó a que’l financiamientu al Obamacare se mantuviera na negociación del presupuestu.

¿Qué dexa de funcionar col gobiernu aparlizáu?

Toles operaciones non esenciales del gobiernu: les rellacionaes colos parques naturales, monumentos hestóricos y museos; les operaciones sanitaries de rutina; los programes d’investigación médica; les llinies telefóniques de consultes médiques; la verificación d’estatus de residencia llegal pa nuevos inmigrantes; casos de xuicios civiles nel Departamentu de Xusticia; cierre cásique total de l’Axencia de Protección Ambiental; oficines regulatories del Departamentu de Trabayu; operaciones de Seguridá Social non asociaes al unviu de xeques de pensiones; retrasu nel procesamientu de vises; interrupoción de dellos servicios médicos pa veteranos… lo que vien a significar, en xunto, que s’interrumpen les funciones de 800 mil alministrativos.

¿Qué se mantién funcionando?

Son dalgo más d’un millón los trabayadores del gobiernu que s’entiende que son consideraos esenciales, anque’l pagu del so sueldu tamién va sufrir un retrasu. Son esenciales: el control del tráficu aereu; los servicios d’emerxencia médica; la patrulla fronteriza; les prisiones federales; la policía; l’asistencia d’emerxencies y desastres; la regulación del sector bancariu; les operaciones de la rede elléctrica; los beneficios por desempléu; el pasu de pensiones; el serviciu postal y la Rserva Federal.

¿Cuándo se van reiniciar les operaciones del Gobiernu?

Cuando n el Congresu haya un plan presupuestariu que seya aprebáu por dambes cámares y seya firmáu pol Presidente, convirtiéndolo en Llei.

¿Ye la primer vez qu’esto pasa?

Non, Dende 1976 el gobiernu de los USA paralizóse 17 veces; el más llargu diose ente 1995 y1996 con una duración de 21 díes.

foto:(Official White House Photo by Pete Souza)