Na década de 1950 Nueva York rebibió la más grande emigración de puertorriqueños, que s’establecieron no qu’anguañu se conoz como’l Barriu Latín de Harlem, y que fue’l llar pa un gran númberu de músicos, tanto boricues como cubanos.

En 1955 tol mundu venía a saber baillar mambo, chachachá y otros ritmos latinos. Los blancos estadounidenses sabíen lo que yera cada ún d’esos ritmos, arriendes de la guaracha, el guaguancó, el bolero y el son montuno. Nesti tiempu, Nueva York contaba con bien de salones de baille, tanto na zona metropolitana de Manhattan como nel Bronx, onde enraigonara tamién una gran comunidá puertorriqueña, especialmente nel sur del barriu.

Este esos bien de salones, The Conga, Park Plaza o Birdland, tien de destacase’l gran Palladium, qu’ente 1948 y 1966 fuera la meca de los clubes de baille de música latina, y non solo pa los hispanos. Esti clube llegó a ser conocíu como “la casa del mambo” durante la efervescencia de la “mambomanía”. Ellí tocaben les orquestes del momentu: la de puertorriqueñu Tito Rodríguez, la de Tito Puente, que nació y medró en El Barrio, fíu de puertorriqueños, y la de cubanu Frank “Machito” Grillo, que fueron figures claves na hestoria de la música popular, y que compartíen escenariu d’avezu con figures del jazz como Cal Tjader o Dizzy Gillespie.

Tamién tien de destacase la presencia en Nueva York, nesa dómina, de los tamién cubanos Arsenio Rodríguez, que se presentaba amás en clubes nel Barrio y nel Bronx, onde se desarrolló otra cultura musical, y Mon Rivera, y el puertorriqueñu Cortijo y el so Combo, col so vocalista Ismael Rivera “El Sonero Mayor”, que truxeron a la Gran Mazana’l soníu de la bomba del folclor puertorriqueñu, asina como la guaracha.

Nesti tiempu sintióse tamién el merengue de la mano d’Ángel Veloria, que lu llevó al Palladium, un clube que yera más visitáu por puertorriqueños de la que se presentaben Cortijo, Veloria o Mon Rivera, porque preferíen los clubes nel Barrio.

El Bronx tenía pa esta fecha más salones de baille que Manhattan, como’l lluxosu Hunt Point Palace, con capacidá pa 2.500 persones, asina como’l Blue Morocco, el Royal Mansion o’l Bronx’s Caravana Club –que se convirtió nel llar de la pachanga-, el Tritons o Tropicana, n’alusión al famosu salón cubanu.

Nesta dómina, ensin televisión nin internet, los salones de baille yeran el centru de diversión y axuntamientu, onde la xente s’axuntaba con amigos y facía nueves amistaes. Los fines de selmana yeren esperaos por toos y llucíense les meyores gales, colos homes vistíos de chaqueta y corbata y les muyeres colos sos elegantes vistíos, sombreros, dacuando guantes y zapatos de tacón altu. El baille yera una especie d’aliviu y momentu de socialización pa una comunidá que naguaba por abrise pasu nun país y llingua nuevos, lluchando duro por sobrevivir.