Mieres.-Dende primeros de los años 90 del sieglu pasáu venía arrastrándose un conflictu ente l’ayuntamientu de Mieres y la constructora Goncesco, por mor de la expropiación d’unes finques urbanes que lleven esos más de trenta años ensin destín d’usu.

La hestoria arranca cola recalificación a primeros de la década anterior a la citada d’esos terrenos como suelu destináu a equipamientos. El grupu Goncesco solicitó entós la expropiación d’estes tres parceles que s’alluguen nel mesmu centru de Mieres, una d’elles bien averada a les dependencies del Consistoriu.

Agora mesmo, una sentencia del Tribunal Supremu ordena a l’ayuntamientu pagar alredor de 2 millones d’euros a esti constructor mierense, al frente del grupu Goncesco. Esta sentencia, que yá s’esperaba dende va tiempu nel ayuntamientu, cayó esta mañana como un xerráu d’agua frío ente los miembros del equipu de gobiernu. Por más que yá se tuviera plena consciencia del resultáu a sabiendes de que la llei del Suelo de 1976 dictaminaba que los terrenos que llevaran más de cinco años ensin proxectu de desarrollu tendríen de ser devueltos al propietariu, dalgo que nun se fizo y que ye lo que la sentencia del Tribunal Supremu vien reparar.

A los llargo d’estos últimos 20 años hubo diferentes xuicios ente l’ayuntamientu y el grupu Goncesco, bien d’ellos perdíos por esta constructora que, sicasí, continuó llitigando hasta’l Tribunal Supremu que, agorea, vien a da-y la razón con una sentencia que nun se pue recurrir.

La situación na que queden les arques del conceyu depués d’esta sentencia ye preocupante, teniendo en cuenta qu’acababa d’aprebar un plan d’axuste que nun llegana siquiera al millón d’euros y que yá resultaba abegosu de facer cumplir.

[©(c)Roland Halbe; Veroeffentlichung nur gegen Honorar, Urhebervermerk und Beleg / Copyrightpermission required for reproduction, Photocredit: Roland Halbe]