Iniciativa pol Asturianu, al traviés de la so Vocalía d'Enseñu, vien de súmase a la denuncia del sindicatu SUATEA pola falta de previsión de la Conseyería d'Educación pa cubrir les places de mayestros d'asturianu y de gallego-asturiano, yá que col cursu entamáu siguen ensin profesoráu pelo menos 14 centros de Primaria y Secundaria. Iniciativa pol Asturianu ta recoyendo estos díes les quexes de padres y alumnos y va entama delles acciones pa tratar de camudar esta situación.

Dende esta organización yá se solicitó va meses a la Conseyería d'Educación un nuevu procesu de formación de llista de mayestros d'asturianu y gallego-asturianu col fin de tener en setiembre'l númberu de docentes necesarios pa cubrir toles places ufiertaes de dicha asignatura. Teniendo en cuenta l'ausencia de convocatoria d'oposiciones al cuerpu de mayestros y, l'importante númberu de xubilaciones, suponíase un aumentu considerable de los interinos a axudicar poles diferentes especialidaes y, polo tanto, la llista d'asturianu quedaría agotada ensin posibilidá d'axudicar vacantes.

Por too esto Iniciativa pol Asturianu reclama a la Conseyería d'Educación la inminente apertura d'una bolsa d'asturianu pa poder cubrir les vacantes que falten, asina  como una actualización de les llistes, tanto d'asturianu como de gallego-asturianu pa evitar tolos problemes que xurden tolos años al entamu del cursu escolar. Aprovechamos pa recordá-y a la Conseyera la promesa que fizo y que nun cumplió de consiguir la creación de la especialidá d'esta asignatura, equiparando asina al profesoráu d'asturianu colos demás especialistes.

El reconocimientu d'esta asignatura ye esencial pal so caltenimientu nos centros escolares y nun pue esperar más, dempués de 30 años d'asturianu nes escueles, ye una vergoña que la situación del profesoráu seya tan llamentable.