La situación pela que tan pasando los xitanos en Francia ta llamando l’atención de les autoridaes europees. Dellos desplñacense ente ciudaes y viven en campamentos, demientres qu’otros tienen residencia fixa. En bien de casos trátase de persones con ciudadanía francesa. Notros, tienen orixen européu (procedentes mayoritariamente de Rumanía y Bulgaria), pero en dambos casos trátaselos como ciudadanos de segunda. Rumanía y Bulgaria son parte de la Xunión Europea dende 2007 y, polo tanto, los sos ciuadanos gocen de la llibre circulación nel territoriu de la Xunión. Ensin embargu, Francia impunxo una moratoria hasta 2012, amplible a 2014, tres de l’adhesión de los dos países pola que los sos nacionales, a partir de los tres meses de residencia nel país, necesiten socilicitar un permisu de trabayu pa permenecer en Francia de manera regular.

Dende va años, la comunidá xitana en Francia vien sufriendo un acosu feroz per parte del estáu qu’en bien de casos recuerda la que sufrieron los xitanos nel tiempu del gobiernu de Vichy. Una de les últimes dramátiques consecuencies d’esti hostigamientu tuvo llugar el pasáu 16 de xunetu cuando Luigi Duquenet, un xoven xitanu procedente de Rumanía, de 22 años, fue chiquináu a tiros pola policía de Loir-et-Cher, provocando la reacción de la comunidá xitana, que causó disturbios na zona.

Les autoridaes competentes, como’l ministru del interior –d’orixen español- y el presidente de la República, ente otros, promueven el desmantelamientu de los poblaos xitanos que se reparten per toa Francia y la repatriación de los xitanos búlgaros y rumanos. Amás, culparon a les persones d’esti orixen étnicu de los problemes de seguridá en Francia, acusación llanzada tamién sobre la población inmigrante en xeneral, con especial énfasis nos últimos tiempos, dende medios oficiales (hasta’l puntu de proponer la privación de la naciuonalidá a aquellos franceses d’orixen inmigrante que cometan un delitu). Dalgo que yá ocurriera de manera sistemática durante’l tiempu de la segunda guerra mundial, nel que los xudíos, xitanos y republicanos españoles fueron deportaos a campos de concentración. Una realidá que la historia oficial francesa intenta facer desaparecer, pero que vuelve al imaxinariu collectivu cuando vuelven a repetise estes imáxenes d’estos díes escontra’l pueblu xitanu.

El gobiernu francés vien destruyendo campamentos xitanos y expulsándolos dende 2002. En 2009 más de 8 mil xitanos rumanos fueron expulsaos del país. La repatriación de más de 40 xitanos el pasáu 19 d’agostu supón un acontecimientu especialmente grave. Anque a estes persones se-yos concedió la nomada “aidanza de retornu”, de 300 € por adultu y 100 € por neñu, la realidá ye que nun se-yos dio opción de quedase. Amás, como tamién se fizo colos xudíos nel so momentu, vienen siendo identificaos nun ficheru pa, en teoría, evitar que puean volver a beneficiase de la citada aidanza, puesto que la moratoria francesa nun pue impidir qu’esos ciudadanos búlgaros y rumanos vuelven ingresar en territoriu galu, en virtú de la llibre circulación de los nacionales de países miembros de la Xunión. Lo que fue puesto de relieve estos díes pol portavoz del executivu comunitariu, qu’alvirtió al presidente francés que los xitanos son ciudadanos europeos a títulu completu y que, amás, tienen “plenu derechu a la llibertá de movimientu nel sen de la Xunión Europea”.

Asina, pa bien d’asociaciones de derechos humanos, ta produciéndose una discriminación d’unes persones por mor del so orixen étnicu. Francia tien optao pola criminalización, estigmatización y exclusión de toos aquellos que tienen orixen xitanu, promoviendo la expulsión del so territoriu de los que nun tienen la nacionalidá francesa y rellacionándolos cola delincuencia. Demientres, el restu de los países europeos observa ensin intervenir esta vulneración clara de derechos fundamentales.