En 1513, va quinientos años, el florentín Nicolás Maquiavelo finaba’l so llibru El Príncipe, ún de los más influyentes de la hestoria del pensamientu occidental y, posiblemente, el fundador de la ciencia política moderna.

Reprobáu pola Ilesia, comentáu por Bacon, Rousseau, Macaulay y Vico ente bien d’otros, lleíu con fervor por Cromwell y Napoleón (inda circulen ediciones anotaes pol emperador), eloxáu por lliberales y reinterpretáu por marxistes como Gramsci, El Príncipe afondó la fama del autor y convirtió’l so apellíu nuna pareya de adxetuvu-sustantivu que s’estienden per toles llingües occidentales: maquiavélicu y maquiavelismu.

El so tema ye’l poder: cómo conquistalu y cómo retenelu, de qué medios valese, qué importancia conceder a los principios y a la fortuna. Un cinismu escandalosu pal so tiempu impregna los conseyos que Maquiavelo dirixe a los príncipes de la Italia del sieglu XVI y de tolos sieglos posteriores. Nes sos máximes la moral cristiana cede tarrén a la eficacia más cruda. Anguañu dizse qu’El Príncipe ye’l manual por excelencia del políticu ambiciosu y pragmáticu.

Pue afirmase entós que la obra que Maquiavelo escribiera va 500 años pa Lorenzo de Médicis nun perdiera nin va perder vixencia. Repasar dellos de los párrafos salientes tal vez permita comprobar hasta qué puntu los nuestros políticos d’anguañu lu tienen como llibru de cabecera. El presente ensin dulda débe-y enforma. Estos sos unpos exemplos:

“A los homes hai que tratalos bien o aplastalos, porque ellos vénguense de les pequeñes ofenses, pero de les grandes nun son quién a vengase. Polo tanto, la ofensa que se-yos faiga tien de ser tan descomanada que nun permita nenguna venganza. (…) Al conquistar un estáu, el que lu ocupa tien de pensar en toles ofenses que necesita facer y faceles toes de guelpe, pa nun tener de renovales cada día”.

“Un príncipe sabiu tien de procurar con astucia dalguna enemistá cuando se-y presente la oportunidá pa que, depués de reprimila, por ello mesmo medre’l so grandor”.

“Ye enforma más seguro ser temíu qu’amáu cuando una de les dos cualidaes falta. (…) Los homes vacilen menos en cometer ofensa al que se fai amar qu’al que se fai temer”.

“Tien de comprendese bien qu’un príncipe, y especialmente un príncipe nuevu, nun pue observar toes aquelles coses poles que los homes son consideraos buenos, porque a menudu, pa mantener l’estáu, vese obligáu a actuar escontra la fe, la humanidá, la caridá, la relixón. Por eso necesita poseer un estáu d’ánimu dispuestu a movese según los vientos de la fortuna y les variaciones de les coses y non allonxase del bien demientres puea y, pola contra, saber introducise nel mal si fuera mester facelo”.

“Un señor prudente nun pue nin debe guardar ficelidá a les sos palabres cuando tal fidelidá se vuelve escontra los sos intereses”.

Y, per último, un conseyu de Maquiavelo que cásique tolos políticos d’anguañu desoyen: “En Príncipe tien dpbastenese de robar bienes porque los homes escaecen más aína la muerte del padre que la perda del patrimoniu”.