Asturies.-La Conseyería d'Educación, Cultura y Deporte convoca una nueva edición de l?Axenda Didáctica Escolar, programa que supón un apoyu al llabor docente del profesoráu de Llingua Asturiana y Gallego-asturianu, al tiempu que permite al alumnáu valorar la rica creación musical, lliteraria o teatral que s'espresa en llingua asturiana.

El día 1 d'ochobre abre'l plazu pa que les empreses privaes, asociaciones o otres entidaes ensin ánimu d'arriquecimientu d?ámbitu asturianu interesaes puedan presentar los sos proyectos d'actividaes artístiques, culturales, lliteraries o musicales n'asturianu o gallego-asturianu, adaptaes al ámbitu escolar. Cada entidá va poder presentar un máximu de cinco proyectos, con especificación de los datos que se citen darréu:

?       Oxetivos didácticos que se quieren consiguir cola actividá
?       Etapa educativa a la que va encaminada l'actividá
?       Material didácticu pa trabayar nos centros
?       Curtiu resume de l'actividá, con información básica de la mesma y de les necesidaes técniques qu'implica'l so desenvolvimiento
?       Costu de l'actividá.

Rematáu'l plazu de presentación de solicitúes, una Comisión d'espertos va encargase de la selección de los proyectos, atendiendo a criterios como la so orixinalidá y posibilidá de desarrollu; l'adecuación al alumnáu, según los criterios pedagóxicos establecíos nos decretos curriculares vixentes nel Principáu d'Asturies; la trayectoria de la entidá que presenta'l proyectu; o l'adecuación a la difusión y promoción del asturianu y del gallego-asturianu, respetando les variedaes llingüístiques de cada zona.

Los proyectos escoyíos van facese públicos al traviés de la páxina web institucional www.educastur.es. Dende?l día siguiente a la publicación, tolos centros públicos y concertaos qu'impartan les asignatures de Llingua Asturiana o Gallego-asturianu van disponer de 10 díes hábiles pa realizar les solicitúes de los proyectos que s?alcuentren dientro del llistáu publicáu.

Nel pasáu cursu 2012-2013, l?Axenda Didáctica Escolar incluyó un total de 39 actividaes: 20 dirixíes a los centros d'Educación Primaria; y 19 a los de Secundaria y Bachilleratu. Los colexos y institutos que se beneficiaron d'esta ufierta fueron un total de 121.