Por Ismael González Arias.- Vete a la páxina de deportes. Míra-yos les cares de los xugadores de los equipos infantiles. Avérate más y míralos directo a los güeyos. Si cuides que les fotos son pequeñes, garra una lupa y aumenta hasta que veas el brillu d’esos güeyos. Nun engañen a naide. Únicamente tienen ganes de xugar.

Demientres más pequeños, meyor. Nada como la liga escolar. A la espera de los primeros partíos oficiales, los equipos nun aparen d’entrenar y de xugar partíos amistosos. Los partíos d’esta categoría disfrútense por partida doble. Como xugador y como espectador. Nel tarrén de xuegu danse cita los valores que son la esencia del fútbol: la ilusión y la entrega. Los dos quieren ganar. Los dos entreguen hasta l’últimu gotu de su mugor pa consiguir la victoria. Como espectador, la imaxen ye soberbia: los meyores xugadores y les meyores xugaes siempre se vieron nun partíu ente guajes. Eso sí que ye cientu per cientu fútbol.

En campu nun hai más que llugar pa la allegría. Los episodios más tristes suceden na grada. Espectadores qu’escaecen que, amás d’espectadores, son padres.

Va tres o cuatro años entró en vigor nos Estaos Xuníos la llei del “Sábadu en silenciu”. Por ella, los padres tan obligaos, un sábadu al mes, a tar callaos na grada demientres ven xugar a los sos fíos. Una bona manera de que, polo menos un sábadu al mes, los neños descansen de sentir les tonteríes que se sienten por esos campos de xuegu. A los propios padres. Un sábadu de silenciu nel que los neños tornen a la esencia del fútbol: la ilusión de ganar y la entrega pa consiguilo.

Equí, pa ser más americanos que los americanos, igual nos venía bien declarar el “Sábadu ensin padres”. Que los neños volvieran a disfrutar con un balón ente los pies. Que los dexaran siguir siendo niños durante la hora que dura’l partíu. Que descasaran noventa minutos –namás noventa minutos-, de cargar riba’l llombu toles frustraciones de los padres.