Esti fin de selmana ta teniendo llugar n’Uviéu, con motivu de la Xornada Europea de la Cultura Xudía, una serie d’actividaes ente les que s’alcuentra un conciertu, una xornada de puertes abiertes na sinagoga y una feria del llibru xudíu.

Remembramos, poro, el resultáu del estudiu realizáu nel 2008 poles universidaes de Leicester y Pompeu Fabra de Barcelona sobre la güelga xenética dexada polos musulmanes y los xudeo-sefardinos na península ibérica. Ún de los resultaos más elevaos de la presencia xudía dábase n’Asturies: los autores de la investigación afirmaben que la metada de los varones de la rexón tiene un marcador xenéticu d’orixen presunto xudíu sefardín.

El trabayu publicólu l’American Journal of Human Genetics. Los investigadores asumíen los sorprendes porcentaxes con miramientu. Per un llau, pol supuestu pequeñu tamañu de l’amuesa asturiana. Per otru, por nun ser quién a descartar otros sustratos d’Oriente Mediu, pero non necesariamente xudíos, como poblamientos neolíticos o fenicios.

Con too, los estudios veníen a sumase a la llarga serie de lleendes qu’esisten nos pueblos asturianos sobre la presencia de xudíos o la descendencia de xudíos de determinaes poblaciones. Tradiciones que pervivieron na tradición oral de llugares como Cangas del Narcea, Tinéu o Teberga, y qu’abarcaron no solo a la población vaqueira sinon tamién a la xalda.

Asina, a la salida de Blimea, camín de Pola Llaviana, la revuelta’l ríu d’Agua Papio, caltién la memoria de ser el llugar nel que se bañaben los xudíos. N’Uviéu mesmu, al delláu de lo qu’anguañu ye’l Teatru Campoamor, taba la nomada Güerta de los Xudíos. Inda se diz en Teberga y otros llugares del occidente d’Asturies frases como “ye roxa como xudía”, pa falar de dalguién que naciera col pelo roxo. Tamién, nún de los sos artículos sobre l’occidente d’Asturies, l’escritor Xuan Bello alantraba la posibilidá de que’l filósofue Baruch Spinoza proviniera de la xudería de Cangas del Narcea.

O’l mesmu fechu de que dellos de los apellíos más estendíos pela Asturies occidental, norte de Lleón, Galicia y norte de Portugal, se correspuendan con bien d’apellíos sefardinos, como Arias (de la palabra hebrea que significa lleón), Vega ( del hebréu “bega”, el primoxénitu), Ortiz (del raigañu hebréu “lluz”) o Prieto, Pulgar, Campos, Escobar, Cordero, Castaño o Pardo. Pue consultase on line el documentu de la “Lista de Apellidos de Judíos conversos que fueron forzados y juzgados por la Inquisición en México en los años 1528-1815”, pa decatase de la bayura d’apellíos comunes n’Asturies.