Díes enantes d’abandonar la cárcel tres de 23 años d’encierru, Jhon Jairo Velasquez Vasquez, nomáu Popeye, la mandrecha del capo del cártel de Medellín Pablo Esbobar, reconoció nun entrevista que participara n’alredor de 3.000 asesinatos. Nuna entrevista cola revista colombiana Semana, Popeye presume del so sangientu pasáu y revela cruentos detalles de los años al delláu del asesináu capo: “Pablo Escobar yera un xeniu, tal vez un xeniu del mal, pero en tou casu un xeniu”.
“Tenía una mente privilexada y un tector de mentires nel cerebru”, continúa declarando l’asesín en Semana. “Si dalguién dicía dalgo que nun yera verdá, inmediatamente lo captaba. Y eso podía costa-y a ún la vida. Inspiraba una llealtá infinita en tolos que creíamos nél. Yo llegué a creer que yera inmortal. El día más triste de la mio vida fue’l día que lu mataron”.
Describiendo al so xefe, prosiguió: “Él nun yera un asesín. Yo cuido qu’el nun matara a más de 20 persones en tola vida. Él enantes que nada yera un líder, un organizador de bandíos y un gran secuestrador”.
Consultáu pola orden de matar a la que fuera la pareya d’Escobar y depués moza d’él, Popeye almitió: “Ye ún de los episodios más dolorosos de la mio vida. Ella fuera de mano moza del patrón, pero quedó embarazada y pa él la familia yera sagrada. Un fíu fuera del matrimoniu yera impensable. Entós fízola albortar a la fuerza y a partir d’esi momentu ella decidió vengase”. Popeye, tres de l’autorización del so xefe, púnxose de mozu d’ella. Pero l’amor terminó cuando’l capo descubrió los contactos d’ella cola DEA. “El patrón llamóme, púnxome la casete y dióme la orden. Popeye, vaya y mátela. Como les órdenes nun se discutíen, tocóme. Usté nun sabe lo que ye matar a una persona a la que s’adora”, relató.
De la que la policía mató al so cuñáu, Mario Henao, Popeye contó qu’Escobar dio la orden d’asesinar efectivos d’esa fuerza, pa los que punxera preciu a les sos cabeces. “Vamos matar policíes. Eso ye más útil que matar xueces porque finalmente son ellos los que nos lleven delantre los xueces. Y diónos la tarifa: 2 millones por policía, 3 por sarxentu, 10 por teniente, 30 por mayor, 50 por coronel y 100 por xeneral”, datalló, pa depués afirmar qu’él personalmente matara a unos 25. “Pero yo dirixía cásique tolos operativos y cuido qu’en total matamos unos 540”, agregó.
D’asesinatos relató tamién cuando-y tocó dar muerte a un amigu d’él, yá que traicionaba coles finances a Escobar. “ël yera mui creyente y lo único que me dixo yera que si-y podía lleer dellos salmos de la Biblia enantes de disparar. Consiguí la Biblia y lleí-y tolo que me pidió y depués d’eso metí-y un tiru”.
Ente tanta respuesta macabra, Popeye confesó yá pel final de la entrevista: “Prestaríame usar la mio experiencia pa contribuyir nel posconfilctu. Lo que tengo vivío nun lo vivió naide. Fui sicariu de Pablo Escobar. Fui compañeru de celda de los peores enemigos de Pablo Escobar. Fui amigu y enemigu de tolos muertos recientes de les guerres de Colombia. Too eso dame un conocimientu y unes experiencies que cuido puen canalizase hacia dalgo constructivo. Quiero enseña-yos a los mozos de Colombia que nun tienen por qué vender les sos vides por un Mercedes-Benz o poles caricies d’una reina de belleza, como fice yo. Oxalá me dean esa oportunidá”.
