Ciodá del Vaticanu.-Nel sábadu 28 de septiembre, día de San Miguel Arcánxel, patrón del Cuerpu de Xendarmería Vaticana, el papa Francisco, na homilía de la misa, dixo que’l diañu trata d’entamar una guerra civil interna, una especie de guerra civil y espiritual: “Ye una guerra que nun se fai con armes, que conocemos; faise cola llingua. Pidamos a San Miguel que non aide nesta guerra: enxamás tenemos de falar mal ún del otru, enxamás abrir los oyíos a los que dan la parpayuela”.

El pontífiz instó tamién a intervenir si sienten a dalguién dando la parpayuela. Pal papa, esti dar la parpayuela, dafecho tenía de convertise nuna llingua vedada nel Vaticanu, porque “xenera’l mal”. “Pídovos”, aseguró’l papa delantre de 100 militares baxo les órdenes de Domenico Giani, que “non solo defendáis les puertes, les ventanes del Vaticanu, que per otra parte ye un trabayu necesariu ya importante, pídovos que defendáis como’l vuestru patrón San Miguel la puerta del corazón del que trabaya en Vaticanu, onde la tentación entra dafecho como en tantos otros llugares”.

Una maldá que resumió’l papa diciendo: “Digo asina, tamién pa mi, pa toos, porque ye una tentación qu’al diañu-y presta enforma: aquella escontra la unidá, cuando les insidies van escontra la unidá de los que viven y trabayen en Vaticanu”. Y nun se trata de la primer vuelta que’l papa fala d’esti mal vezu de dar la parpayuela. El miércoles pa´sau, a lo llargo de la ytradicional audiencia na plaza San Pedru, l’obispu de Roma afirmó: “Enantes de bilordiar, un cristianu tien de mordese la llingua (…) dalgo que-y va facer munchu bien porque la llingua hincha y nun va poder falar, nin dar la parpayuela”.