El director principal del distribuidor per internet Amazon, Jeff Bezos, qu’acaba de comprar el diariu The Washington Post, estimó que los diarios impresos van ser “un productu de lluxu”, comparando’l so provenir col de los caballos nel tresporte nel tiempu nel qu’empezaron a aparecer los primeros vehículos a motor.

“Un día, nun sé en cuántos años, podríen ser décades, los periódicos impresos en papel podríen acabar siendo un productu de lluxu”, respondió va escases feches a una periodista de la cadena NBC que-y preguntaba si podía pensase que llegaría un día nel que’l prestixosu diariu dexara de publicase na so versión en papel.

“La xente continúa teniendo caballos, pero nun ye’l principal mediu de tresporte pa dir a la oficina”, afirmó.

Al empiezu d’agostu, Jeff Bezos sorprendiera col anunciu de la compra en 250 millones de dólares del venerable The Washington Post, el cotidianu que reveló l’escándalu Watergate nos años 70, pero qu’agora, al igual que’l resto de la prensa escrita, enfrenta la competencia creciente de la información per internet.

The Wasington Post ye’l más grande y más antiguu diariu de la capital de los USA y ye consideráu xeneralmente como ún de los meyores periódicos estadounidenses, xunto col New York Times y el Wall Street Journal. El Post tiense distinguío polos sos reportaxes sobre la Casa Blanca, el Congresu y otros aspectos del gobiernu americanu.