La muerte d’al menos 44 trabayadores nepalíes nes últimes selmanes y los abusos que padecen otros miles nes obres pal Mundial de Qatar 2022 fueron denunciaes pol diariu inglés The Guardian nel marcu d’una investigación sobre la situación llaboral del país.

El diariu afirma que cada día del branu acabante de finar morriera al menos un obreru nepalí, na so mayoría bien mozos y a causa de paros cardíacos. Los nepalíes son el más grande grupu de trabayadores en Qatar y afronten situaciones d’explotación y abusos asemeyaos a los que la Organización Internacional del Trabayu (OIT) define como esclavitú. Según documentos obteníos por The Guardian de la embaxada nepalí de Doha, al menos 44 trabayadores morrieron ente’l 4 de xunu y el 8 d’agostu d’esti añu. La metada sufrió paros cardíacos o accidentes nel llugar de trabayu, según la investigación titulada “Los esclavos del Mundial de Qatar”.

Amás, hai denuncies de que dellos nepalíes afirmaron nun recibir la paga correspondiente a varios meses, a otros confiscóse-yos el pasaporte y denegóse-yos agua metanes del intensu calor del branu, demientres qu’unos trenta buscaron refuxu na so embaxada en Doha pa escapar de les condiciones brutales nes que taben trabayando, afirmó’l diariu inglés.

Bien de trabayadores nepalíes afirmen que na ciuda n’obres de Lusail City, na que se constrúi un estadiu pa 90 mil persones y que va agospiar la final del Mundial 2022, hai trabayadores que quieren dise y la empresa nun los dexa. Estos trabayadores, según la investigación del diariu citáu, viven en Qatar en terribles condiciones. Hasta 12 persones comparten un cuartu n’hostales y fondes mui precaries. Bien d’estos inmmigrantes tienen deldes en Nepal, por mor de tener de paga-y al axente que-yos alcontró’l trabayu.

L’alcance d’esta explotación llevó al embaxador nepalí en Qatar, Jumari Sharma, al calificar l’emiratu como “cárcel abierta”.