Mieres.-Más allá de ser la fiesta del Val.le de Cuna, un rosariu de pequeños pueblos de la Cuenca’l Caudal nel conceyu de Mieres, la romería del 27 de septiembre devuelve a la xente’l sentimientude pertenencia a una gran comarca qu’anguañu denomínase La Montaña Central pero que, hestóricamente, bien a correspondese col antiguu conceyón de L.lena.

A mediaos del sieglu XIX la romería yera’l principal puntu d’alcuentru de la cultura tradicional. La canción asturiana, la música de baille, la danza… y toa una riestra d’actividaes populares dábense cita alredor de la fiesta grande del pueblu. El trabayu del campu yera duru y la cellebración de los santos patrones llamaba a los vecinos a disfrutar del merecíu descansu y de les ganes d’esparder. Alredor de la danza’l pueblu reafirmaba’l so calter de comunidá. Cola música desfogaba les sos penes. Nos sos cantares falaba de la so tierra, del so trabayu, de los sos sentimientos y de les sos hestories. Cola disculpa de la so festividá xuntábense alredor de la ermita la familia, los amigos, los conocíos y tolos que veníen de fuera a disfrutar del momentu.

El calendariu de tolos conceyos taba plagáu de pequeñes fiestes a lo llargo de tol añu. Namás delles trespasaben les llendes de la parroquia y abarcaben tol conceyu. Y delles más llegaben cola so reputación a tola so comarca. Esti yera’l casu de la fiesta por excelencia del sur d’Asturies, la que xunía nel su entornu a tolos vecinos del conceyón de L.lena: la romería de los Mártires Cosme y Damián.

Na documentación de la dómina la fiesta yera conocida en toa Asturies como Los Märtires de L.lena. L.lena non solo yera’l gran conceyu qu’incluyía les llendes de lo qu’anguaño ye Mieres, sinon que tamién venía a ser la tierra qu’ocupaba la más grande extensión del centru sur d’Asturies. Al delláu de los tamién grandes conceyos d’Ayer y Quirós, que teníen igualmente les sos grandes romeríes con gran poder d’atracción nel so entornu, pero qu’acabaron teniendo tamién de referencia la romería de Los Mártires como la gran cita de septiembre: la que representaba’l piesllu de tol calendariu agrícola del branu y la que llamaba a afrontar de nuevo’l llargu iviernu.

Depués, según fue avanzando’l sieglu XIX, la pequeña villa de Mieres del Camín y el conceyu de Mieres en xunto, fueron adquiriendo una importancia industrial enorme. El so poder económicu llevóla a independizase de L.lena y a acabar atropando alredor una serie de parroquies que s’amestaron a esti deséu de non pertenencia al gran conceyón. Ente eses parroquies tuvieron les de Gal.legos y Valdecuna, dambes del Val.le de Cuna, onde s’alluga la ermita de san Cosme y san Damián.

Esta independencia del conceyu de Mieres nun significó un cambiu inmediatu nel poder d’atracción de la romería de Los Mártires sobre’l so entornu. Pero, el pasu del tiempu fue llevando a desaparecer el nome de Mártires de L.lena. Nin siquiera se produxo’l cambiu a Mártires de Mieres, por más que l’ayuntamientu tuviera esta festividá como la más significativa del conceyu. Lo que sigue ocurriendo: San Xuan ye namás la fiesta de los alredores de Mieres y, El Cristu la Paz, la de Turón. La única festividá que sigue xuniendo en día festivu a tol conceyu ye la de Los Mártires.

Al nun tomar de manera popular el nome del conceyu y ser Los Mártires de Mieres, la romería pasó col tiempu a ser conocida pol nome’l valle nel que se lleva al acabu: Los Mártires de Cuna (y si acasu, de manera inda más restrictiva, pol nome de la parroruia na que tenía llugar: Los Mártires de Valdecuna). Un procesu de reducción del so nome que lleva a que, a primeros del sieglu XXI como tamos, la romería seya yá pa enforma xente Los Mártires d’Insierto, el llugar de la parroquia nel que s’afaya la ermita.

Un llugar y una fiesta que siguen teniendo un inmensu atractivu pa los miles de persones que tyolos años, dende hores bien tempranes, s’averen al práu de la ermita, a Insierto y al valle. Demientres sigue sonando de fondo’l cantar de Víctor Manuel: “Van subiendo los mozos…”