De la que los árabes aportaron al norte de la península, les reliquies yá s’escondieran nel Monsagru (Morcín), hasta’l día nel qu’Alfonso II les rescataba llevandándoles a la capital, Uviéu, onde contruyía una ilesia pa la so custodia. El llugar diba dir dedicáu al Arcánxel San Gabriel y ye lo que llamamos la Cámara Santa d’Uviéu.

Dende entós p’acá, les reliquies pasaron de ser nelles mesmes la gran atracción de la capital, a pasar cásique desapercibíes nel presente. Hasta’l puntu de llegar a sorprender la iniciativa de creación d’un Muséu dedicáu a les reliquies, cuando estadísticamente, el turismu que mueven anguañu esti tipu d’obxetos ye bien escasu.

Pero, ¿qué ye lo qu’escuenden l’Arca Santa, más allá del “pañolón”, nome popular que se-y dio siempre al sudariu cola supuesta sangre de Cristo? Pues coses tan sorprendentes como les 10 que s’indiquen de siguío:

1 Un zoquete de pan de la Última Cena.

2 La variquina de Moisés.

3 Una piedra del monte Sinaí que tamién trió Mosiés al baxar.

4 El mantu del profeta Elías (yá que subió al cielu ensin él).

5 Lleche de la Virxen, de cuando amantaba al Neñu.

6 Gadechos de María Magdalena.

7 Tierra santa triada por Xesús.

8 Clavos de la cruz.

9 La corona d’espines.

10 Una montonera de güesos de santos; de los más que conocíos san Pedro, san Pablo, san Xuan, santu Tomás, san Xuan Bautista y María Magdalena; hasta los menos famosos, como san Cucufate, san Pantaleón, santa Pomposa, san Simplicio, santa Rufina y san Augurio.

El proyectu de sacar alantre’l Muséu céntrase na publicidá xenerada pol “pañolón”. Con too, un bon desarrollu de márketing priorizaría otres reliquies pol so interés mediáticu. El proyectu sigue’l so desarrollu alministrativu y políticu correspondiente.