El 8 de febreru de 1896 el dramaturgu llenense Vital Aza estrena nel Teatru Lara de Madrid la so obra “La Praviana”. Na escena XII, de la que l’actor qu’encarna’l papel de Luciano queda solu nel escenariu, comienza a sentir una tonada que se detién a escuchar. Tol mundu sabe de qué cantar se trata. Tol mundu n’Asturies y tol mundu en Madrid.

“Soi de Pravia, soi de Pravia / y mio madre una praviana / y por eso en mi nun cabe / partida nenguna mala”.

Tol mundu la conoz porque ye ún de los grandes ésitos de la música vocal del momentu. Sábese que ye asturiana, pero nun dexen d’interpretala en tolos tablaos flamencos de la capital española. Ye más, el cantaor flamenco más reputáu d’aquellos años, Antonio Pozo, “El Mochuelo”, acaba de dexala grabada nún cilindru d’Edison, un inventu que malapenes lleva unos años sonando pero col que yá cuenten en casa les principales families de la burguesía madrilana.

Cada cilindru ye un pieza única. Tomás Alba Edison llogró un inventu espectacular. Con un problema: lo grabao ye lo qu’hai: nun esiste posibilidá de producción en cadena. Desconozse cuántes pravianes grabó El Mochuelo. Supónse qu’ente cien y quinientes. Lo que significa que, ente cien y quinientes veces, repitió la mesma tonada pa que quedara grabada.

Tamos falando de finales del sieglu XIX. Tovía queden unos cuantos años pa qu’esistan los discos redondos de la casa Gramofón. Unos cuantos años pa que El Gaiteru Llibardón nos dexe muestres de la so voz y la so gaita. Tovía queda muncho por estudiar d’aquellos años. Pero, hasta que se demuestre lo contrario, el primer cantaor en grabar una tonada asturiana fue’l maestru sevillanu Antonio Pozo, El Mochuelo.

El Mochuelo

La voz d’esti cantaor fuera tan prodixosa que quedara rexistrada en más de trenta mil cilendros de cera d’Edison. O, lo que ye lo mesmo, más de trenta mil veces se punxo delantre del aparatu grabador y dexó la so voz impresa nél. Nun se sabe de nengún otru cantante, de nengún otru xéneru, que supere una cifra tan espectacular.

Antonio Pozo Millán naciera en Sevilla nel añu 1868 y morriera nel pueblu segovianu de San Rafael en plena Guerra Civil, nel añu 1937. El nomatu d’El Mochuelo viniéra-y d’una broma d’un aficionáu que quixo contraponer el so arte col d’otru gran cantaor de la época al que nomaben El Canario.

La sonadía d’El Mochuelo fuera enorme naquellos años de finales del sieglu XIX y primeros del XX. Empezara bien mozu actuando pelos pueblos d’Andalucía, de tablao en tablao, de fonda en fonda. Nos sos viaxes llegó a conocer a Silverio Franconetti, col qu’actuó en diverses ocasiones, y a bien d’otros de los grandes del so tiempu.

Pero, ensin dulda, comenzó a garrar nome al ser ún de los primeros en grabar nos cilindros d’Edison. P’acabar, tiempu alantre, faciéndolo tamién nos de pizarra. Lo que lleva a tener d’él una estensa discografía, por más que’l tiempu la fizo cayer nel más completu escaecimientu hasta va pocos años en qu’emprima reeditase dientro de dalguna de les colecciones discográfiques que se faen a partir de grabaciones antigües.

Nesti momentu, acabante de salir al mercáu, contamos cola so versión del cantar “De Santander a Xixón”, na qu’El Mochuelo canta:

“De Santander a Xixón / tien hermosa carretera / pero, en llegando a Xixón / echa sidra, tabernera”.

Non solo nesta estrofa emplea’l términu Xixón, sinon tamién na coplilla de cierre, na que fala “de Xixón al Carbayín”.

Antonio Pozo viaxó a América y actuó en bien de países y delantre de los públicos más diversos. Precedíalu la fama de los sos discos grabaos, siendo una de les primeres grandes estrelles de la música universal del momentu y, más que nada, la primera gran figura del flamenco como seña d’identidá d’España entero.

El xéneru de la praviana garra puxu na Andalucía d’aquelles dómines y son varios los cantaores que s’animen a incorporar esti nuevu aire al so repertoriu, por más que dellos puristes clamiaran contra’l xéneru por nun ser de raigón andaluz. Con too, nun dexó d’haber flamencólogos que la emparentaron con antiguos cantes de procedencia andaluza, como los antiguos pregones de caramelos de Gabriel Macandé.

“A la salía de Asturias / y a la entrada en la montaña / fabrico mis caramelos / pa venderlos en España. / Son de anís, naranja y fresa / y si los queréis de menta / también los llevo limón / ¡caramelos, caramelos! / ¿quién quiere mis caramelos? / los de menta llevo yo / comprármelos, señoritos / comprármelos, por favor”.

Manuel de Falla, en primer llugar, y cásique tolos estructuradores de los cantes y los xéneros del flamenco, desdexaron la praviana, como cantu foranu que yera. Con too, nel xéneru de la praviana flamenca dexaron grabación y nome cantaores como’l Cojo Luque, María la Talegona y, más que naide, El Niño de la Rosa Fina de Casares (que tamién tien rexistraes, como El Mochuelo, otres asturianaes –y baxo’l nome d’asturianaes, ensin renegar del so orixen-), cola que diz asina:

“Soy de Pravia / y mi mare la praviana / y, ¿cómo no ser de Pravia / si mi mare es asturiana? / En la salida de Asturias / al entrar en la montaña / tres veces me arreventó / en el monte una asturiana”.

El cante por pravianas se sigue practicando nel ámbitu flamenco, anque de manera mui reducida. Últimamente grabólu l’ecijano Rafael Heredia Flores, nel añu 1995, depués d’una vida dedicada al baile flamenco y de ganar, de toles formes, ún de los concursos más reputaos de la escena sureña: la Lámpara Minera del Festival del Cante de las Minas de La Unión (Murcia). Como tamién tien grabaes delles pravianes Manuel Tejuela nel añu 1999, xunto a Pepe Habichuela. Como la que diz:

“Soy de Pravia, soy praviano / y madre una praviana / por eso me gusta a mi / estas palmas tan gitanas”.

Otros cantes

Los flamencólogos son bien reacios a calificar como foranos determinaos cantes, intentamdo na midida de les sos posibilidaes buscar dalgún orixen propiu enantes de da-y a un cante carta d’identidá de fuera del espaciu andaluz o de la so zona d’influencia directa. Con too, bien d’ellos consideren de raigañu asturianu, amás d’a la citada praviana, al garrotín (que popularizara, ente tantos, Lola Flores) y l’asturiana (xéneru enforma más minoritariu y menos conocíu).

Pero, esisten importantes vinculaciones ente ún de los cantes mayores, la toná, y el propiu d’Asturies, más antigüu y conocíu baxo’l nome de tonaes de la tierra. Por más que tamién guarden vinculación con modalidaes norteñes cantes como’l fandango, la montañesa y la farruca.

La praviana asturiana ye un xéneru tradicional integráu dientro de les llamaes tonaes braves, aquelles nes que la cuerda ye la dominante.  Dientro d’esti xéneru esiste la modalidá na que se suel pidir l’aprobación del oyente col característicu ¡guó!, como ocurre con “Amagostasti castañes” o “Cuatro chavales de Ceares”. Nesti casu, amás de ser la cuerda la dominante, resuelven na tónica. Aque tamién hai otres dientro del xéneru que pola manera de resolver nun llamen a l’aprobación del oyente, como ocurre con “Carretera de Colloto” o “Los corales que me disti”. Son pravianes, amás de la conocida “Soi de Pravia”, otres como “Canteros de Covadonga”.