L’autopista cruza l’Esla y tres d’una filera de naves industriales supónse que s’escuenda Benavente.

Esto non siempre fuera asina. El valor estratéxicu de Benavente fuera enorme n’otru tiempu. Supiéronlo los briegaecios –tribu de los ástures cismontanos-, cuando construyeron sobre ella ún de los sos castros más importantes. Fue obxetu de cubicia tola Alta Edá Media, ente visigodos y suevos. Volvió ser frontera ente cristianos y musulmanes. Quemáronla al so pasu les tropes franceses.

Por eso resulta complicao ver dalgo de Benavente más p’allá de la filera de naves industriales y los carriles de l’autopista que se bifurquen a Zamora, enantes del pasu del Esla, a Lleón, malapenas trespasáu, y a La Senabria, La Coruña y Uviéu, bien poco depués.

Anguañu, el valor estratéxicu comercial de Benavente sigue siendo grande. Ye testigu d’ello les mesmes naves industriales. Yelo tamién el so importante comerciu, la so oferta hostelera y el carácter que-y da ser cruce de caminos.

El cruce de tolos caminos

La Virxen de la Vega contempla les agües del Esla dende riba la ponte. Esta ye la descripción escacta del escudu de la villa. Benavente nun s’entendería ensin la ponte del Esla.

Ye abegoso dar agora cola vieya ponte. L’autopista nun permite ver el ríu siquiera. Tien d’entrase al polígonu industrial a les puertes de Benavente pa, depués de perdese bien de vueltes y volver perdese tres de preguntar otres tantes, cruzar per un carril asfaltáu per enriba l’autopista y averase pela caxa de lo que fuera la vieya carretera a lo que queda de l’antigua y magnífica ponte del Esla.

Dende ella, mirar les agües del ríu significa retroceder cientos d’años. Da la sensación de que’l mundu nun cambiara. Una sensación estraña cuando, detrás tuyo, tas sintiendo’l pasu de los camiones poles xuntes de dilatación de les pontes imponentes de l’autopista.

Con too, ye mui recomendable baxar a la ponte vieya. Vela como, tovía, impresionante, s’asitia riba’l ríu. Ver, tamién, los restos de lo que fuera la so prolongación pela vega, per enriba de los llerones que les avenides del Esla estacionalmente dexaben sentir.

El bosque de ribera a l’altura del Esla ye d’una bayura xabaz. Más que nada si se compara col paisaxe que s’afaya a escasos cien metros de trespasar el ríu. La Tierra de Campos s’allarga hasta la raya del horizonte. El solar de los antiguos vacceos. Los Campos Góticos d’otrora.

L’Esla cumple equí, como en tantos otros llugares, de frontera. Benavente yera asina, el llugar de pasu del ríu, el cruce dende bien antiguo de tolos caminos del mundu conocíu.

Per equí pasaba la calzada romana ente les dos ciudaes Augustes, La Emérita (Mérida) y l’Astúrica (Astorga). D’equí partía la calzada que se dirixía a Occelo Dauri (Zamora). Per delantre trevesaba la que diba camín de Caesar Augusta (Zaragoza).

A naide estraña que continúe siendo un cruce de caminos. Por más qu’agora’l so interés pareza menguáu pol meru fechu de nun se ver. Arrequexada. Escaecida. Col alma daqué perdida. Enriba d’una llomba que yá nun se ve que lo sea.

Lo que fuera

Cuenta la crónica de la época del pasu de les tropes franceses:

“Ardieron cien casas, saquearon sus conventos e iglesias y el maravilloso castillo de los Pimenteles, unida a la no menos brillante de los Osunas, ardió como pira incendiada por tanta barbarie”.

El mesmu emperador Napoleón tuviera en Benavente, encargándose de la derrota de les tropes ingleses que fuxíen hacia La Coruña. Ún de los sos xenerales de caballería, Lefébvre Desnouettes, cometió la imprudencia d’adentrase nes tierres del Esla ensin la protección del so emperador y tuvo de sufrir la más cruel de les derrotes.

Benavente, más allá del incendiu que la dexara nes ruines va doscientos años, requier una visita. Como homenaxe a lo que fuera. Como una manera de recordar, mirando dende lo alto de la llomba, como yera’l mundu nel tiempu nel que Benavente tenía la llave de l’Asturies Cismontana.

Como señal cimera de la llomba, la muria del sieglu XII y la Torre del Caracol, del sieglu XVI, agora Parador Nacional, memoria del señoríu de los Pimenteles, condes de Benavente. Poco más qu’estes piedres quedaron tres del pasu de les llames y de les tropes franceses.

La Torre, de dos fachaes, amuesa miradores d’arcos escazaos, con cubos voladizos nos ángulos. Na fachada sur, l’escudu de la casa de los Pimenteles.

Del restu monumental de Benavente, paga la pena la visita a la Ilesia románica de Santa María d’Azogue (nome que remite al tiempu nel que’l mercáu tenía llugar a los sos pies, na Edá Media). La puerta sur tien de motivu iconográficu l’Agnus Dei, el corderu místicu de Cristu arrodiáu de cuatro ánxeles. Na arquivolta superior alviértese una Eva desnuda, siguida de los símbolos de los cuatro evanxelistes. Frente a Eva, la Virxen María tría enriba la serpiente.

Románica, tamién, ye la Ilesia de San Xuan del Mercáu, templu que tuviera baxo la protección del los caballeros de la Orden del Hospital de San Xuan, de los que-y vien l’actual advocación. La Orden encargóse de la supervisión de les obres y nella l’estilu románicu ye más puru que na citada de Santa María d’Azogue, que sufrió un llargu procesu de construcción de varios sieglos.

Benavente presenta la traza d’una villa moderna, de cais peatonales que la treviesen de parte a parte y que, arriendes de cruce de caminos, continúa ostentando la capitalidá, frente a Zamora, de la tierra más allá del Esla.

Un ríu que dixebra dos Zamores bien estremaes. Un ríu que sigue necesitando d’un importante pasu pa cruzar. La moderna ponte. A escasos venti metros de l’antigua. La mesma tierra. El mesmu ríu.