Ismael G. Arias.- “Viníi, xente, xuntaivos / auquiera que teis / y almitíi que les agües / medren alredor / y aceptai que pronto / va calavos los güesos / si cuidáis qu’hai tiempu / pa salvavos / va ser meyor que nadéis / o vais fundir como piedres / porque los tiempos tan cambiando”.

Agora resulta fácil da-y a Bob Dylan el Premiu Príncipe d’Asturies. Ye la gran figura. Ye’l personaxe de referencia. Pero hubo un día nel que les coses nun taben tan clares, cuando yá llevaba años acompañándose de la so guitarra acústica. Aquel día, l’últimu domingu d’agostu de 1965, cambió pa siempre la hestoria de la música popular norteamericana y, como consecuencia, del mundu enteru. Aquel día Bob Dylan tocaba nel Festival de Newport delantre de 15 mil persones, cuando fue escandalósamente abucheáu por salir al escenariu empuñando una guitarra Fender Eléctrica.

“Viníi escritores y críticos / que profetizáis cola pluma / y abríi bien los güeyos / la ocasión nun se va repitir / y nun echar la llingua a pacer / que la ruleta tovía xira / y nun se dixo’l nome / del elexíu / porque’l perdedor agora / va ser el ganador depués / porque los tiempos tan cambiando”.

Agora resulta fácil dicir que Manolo Quirós ye la figura de referencia de la música asturiana moderna. Pero hubo un tiempu, a finales d’aquellos años sesenta, en que ente tolos grandes gaiteros qu’había n’Asturies, namás que ún, solamente ún, s’atrevió a xuntar la música tradicional de la so tierra colos instrumentos electrónicos del so tiempu, de la música moderna. Contra la opinión de tolos puristes –que siempre los hai-, contra la opinión de tolos entendíos -que siempre los hai-, contra vientu y marea.

“Viníi senadores, congresistes/ por favor oyíi la llamada / nun vos quedar a la puerta / nun atropéis la entrada / porque va salir mancáu / el que se ponga delantre / fuera hai una batalla / descomanada / pronto va picar nes vuestres ventanes / y van abrise les vuestres muries / porque los tiempos tan cambiando”.

Los tiempos taben cambiando, dicíalo Bob Dylan nuna de les sos canciones más conocíes. Pero Asturies, a finales de los años sesenta, nun yera Nueva York, por más qu’en llugares como Xixón, el mesmu Uviéu o nes Cuenques, yá d’aquella, más de mediu millar de grupos de rock y de pop empuñaben les sos guitarres eléctriques y facíennos creer que yera cierto que los tiempos taben cambiando. Por más que nes catacumbes de delles parroquies asturianes, como la de Miranda d’Avilés, como la de Santa Marina de Mieres, como la del Sangráu Corazón de Xixón y como tantes otres, cientos de moces y moces cuidaben que yera cierto que los tiempos taben cambiando y empeñábense en cantalo nuna llingua na que cantalo representaba de verdá un verdaderu cambiu.

“Viníi padres y madres / alredor de la tierra / y nun criticar / lo que nun sois a entender / los vuestros fíos y fíes / van al so aire / el vuestru camín / ta carcomíu / por favor dexái pasu a lo nuevo / si nun podéis echar una mano / porque los tiempos tan cambiando”.

Por eso agora s’entiende que cuando Manolo Quirós encontró a Chus Pedro y a la xente del Nuberu, namás tardara 24 hores en convertise nun miembru más del grupu. La voz de Chus Pedro, la guitarra de Manolo Peñayos, la gaita de Manolo Quirós y el restu d’intrumentos de tantos otros músicos asturianos que pasaron por Nuberu, cambiaron pa siempre la música asturiana.

“Hai una llinia trazada/ y marcando’l destín / los más tranquilos / van ser los más rápidos / como esti presente / va ser depués pasáu / l’orden va / aína desvaneciéndose / y el primeru agora / más llueu va ser l’últimu / porque los tiempos tan cambiando”.

Esta ye una hestoria que malapenes tien treinta años y tenemos la inmensa tristeza de que Manolo Quirós nun ta equí, en primera persona, pa poder contánosla.