Un estudiu de la Universidá Cristiana de Fort Worth (Texes), realizáu pol equipu del profesor de psicoloxía Eric M. Russell y publicáu esti añu na revista Evolutionary Psichology, demostró lo que bien de muyeres sospechaben y lo que tien reflexao en bien de películes el cine: el meyor amigu pa una muyer heterosexual ye un home homosexual.

Nin competencia nin atracción, sinon collaboración. Esta ye tal vez la receta qu’asegura l’amistá y la confianza ente una muyer hetero y un varón gai. Un vínculu mui especial que vimos reflexáu en películes (como escacer a Ruppert Everett como’l cómpliz absolutu de Julia Roberts en La boda de mi mejor amigo) y en series de televisión como Modern Family, onde nún de los episodios de les primeres temporaes, Cameron ye quién a conquistar a una moza hetero qu’en realidá lo que nagua ye por tener un amigu gai.

L’estudiu tituláu ‘Friends with benefits, but without the sex’ (Amigos con derechos, pero ensin sexu), realizóse al traviés de la rede social Facebook y participaron 88 muyeres heterosexuales escoyíes ente les propies estudiantes de la universidá y 58 varones homosexuales.

Los investigadores concluyeron que la clave n’estes rellaciones ye la confianza. La posible competencia ente dos muyeres heterosexuales fai qu’ésta disminuya, y con un home heterosexual, tamién disminúi porque la muyer cuida qu’él pue tar con ella por un interés sexual. Respecto a los gais, la competencia colos homes que tienen la so mesma tendencia ye evidente, demientres que coles muyeres heterosexuales aumenta’l so nivel de confianza.

El gai sabe que la moza ye consciente de que nun tien nada que facer con él, que nun va tar implicada en engarraces porque ella nun ye una rival nin se va sentir evaluada como por un home hetero. Por eso elévase’l gráu de sinceridá y honestidá nesti tipu de rellaciones, porque negún tien nada que ganar o que perder y nun perciben al otru como amenaza, describe l’estudiu.