Dende’l cumal del espaciu hasta les zones abisales marines, la dinastía de cintíficos-aventureros suizos Piccard tien dexada una güelga intachable na cartografía de la exploración. Siguiendo’l pruyimientu de los sos xenes azarientos, los Piccard lleven cásique un sieglu inflamando la nuestra imaxinación collectiva con fazañes tan importantes como asombroses. Agora mesmo, el representante d’esta última xeneración intanta da-y la vuelta al mundu nun avión implusáu por enerxía solar.

Si dacuando esistió un científicu que pudiera sirvir como prototipu del inventor xeniu y l’explorador osáu, tendría de considerase al patriarca de la familia, Auguste Piccard, un profesor de física de Basilea qu’exploró de mano los más grandes altores de la estratosfera y depués les abisales depresiones marines en fascinantes máquines creaes por él mesmu.

Esti patriarca de los Piccard ta inmortalizáu nel célebre profesor Tornasol de les hestorietes cómiques de Tintín, creaes pol caricaturista belga Hergé, que veía al famosu científicu caleyar peles casi de Bruxelles y nun pudo menos que retratalu. Hollywood tamién-y rindió homenaxe cola creación del capitán Jean-Luc Picard (anque con una sola “c”), de la serie Star Trek.

En 1960, dos años depués de la muerte d’Auguste, el so fíu Jacques algama’l puntu más fonderu del llechu marín, 10.911 m. na Fosa de les Marianes, frente a Guam , nel Pacíficu, con un batiscafu heriede del que diseñara Auguste Piccard. Más alantre, la misión Challenger Deep fue recreada nel 2012 por James Cameron nel so modernu sumerxible.

¿Cómo medrar inmune a talu poder de seducción pola cienca y la exploración? De la que’l fíu de Jacques, Bertrand, tuviera usu de razón supo que diba caminar –más bien a esnalar- tres de los pasos del padre y del güelu, y de dellos miembros más de la familia que tamién tan y tuvieron nel negociu de l’aventura.

Agora, a los sos 55 años, tien la intención de dar la vuelta al mundu nun avión que nun use nin una gota combustible. Un avión dafechamente elléctricu, alimentáu tou él pela lluz solar. Anque Piccard ye consciente de que cargar 300 pasaxeros nun avión solar comercial nun ye dalgo factible, sostién que sí pue ser l’empiezu d’una tecnoloxía que busca aliviar la nuestra dependencia de los hidrocarburos y explorar alternatives más llimpies. El proyectu Solar Impulse surdió nel 2003, col apoyu de la Escuela Politécnica Federal de Lausana.