A partir del nomamientu de Teberga como Pueblu Exemplar pola Fundación Príncipe d’Asturies, el conceyu y les sos hestories vuelven resonar nes páxines web especializaes n’exoterismu, maxía y fenómenos extraños, amás d’en bien d’otres rellacionaes cola hestoria paralela.

Asina, nun hai más que teclear en google sobre les “momies maldites” de Teberga pa topar una hestoria más allá de la que nos cuenta’l guía oficial de la colexata de San Pedru de La Plaza, onde se topen, nes mínimu espaciu del pequeñu muséu parroquial, les momies del Marqués de Valdecarzana y el fíu. Hestories rellacionaes cola supuesta crueldá d’estos personaxes, lo que llevó a que’l so procesu de momificación nun fuera natural sinon frutu d’una maldición.

Como tamién les hestories alredor del santiruariu de la Virxen del Cébranu, patrona del conceyu y conocida tamién nel llugar baxo’l nome de Virxen de la Pena Blanca –fechu que refier a la Pena Sobia, la montaña na que s’asitia-. Arriendes de curar una llarga montonera de males, la calderina de bronce de la Virxen, posaba na cabeza de los feligreses que visiten el santuariu, llibra de migrañes, dolores de cabeza en xeneral y cuantes enfermedaes afecten al cerebru. Como diz un dichu popular: “La Virxen tuviera un día en Fátima y otru en Lourdes, pero nel Cébranu pasa’l restu l’añu”.

La mesma Pena Sobia ye un topónimu que, según X. Ll. García Arias, fai al dios Xúpiter. Lo que dexaría constancia de que se trata d’un llugar veneráu dende l’antigüedá, yá que’l topónimu romanu vendría a santificar un llugar de cultu pre-romanu, de la mesma manera que’l satuariu y l’advocación a la Virxen vendría a cristianizar creencies anteriores.

El mesmu romance que se canta a la Virxen, un vezu agora dafechamente desaniciáu, cuenta na so primer estrofa: “Polas almenas del cielu / paséase una donce??a / blanca, roxa, co??orada / re??uce como una estre??a”. A partir de los años 50 del sieglu pasáu, con motivu de la visita del arzobispu pa la coronación de la Virxen, cambióse la lletra por otra en castellanu compuesta por una maestra del pueblu de Fresneo. El cantar orixinal, y más que nada la so llinia melódica, refier en una montonera de páxines rellacionaes con música tradicional, a que se trata d’ún de los últimos exemplos vivos de cantu gregorianu de ritu mozárabe.

Y, per útlimo, tamién al traviés de la rede, muévesen los Adoradores del Texu, con ramificaciones notros llugares d’España, Francia, Inglaterra ya Irlanda, que tienen en Teberga ún de los sos puntos de referencia: el texu de delantre de la citada colexata de San Pedru. Nun va munchos años fueran dos los exemplares qu’había nel llugar, pero una enfermedá acabó secando ún d’ellos. El texu milenariu que pervive, al delláu d’un gran cruceru en piedra, conviértese asina nún de los más reputaos p’aquellos que rinden cultu a los árboles. Igualmente, otru texu bien referenciáu y reputáu ye’l que se llevanta nel pueblu teberganu de La Focei??a.