Benjamín Paoa, de 50 años, natural de la islla chilena de Pascua, músicu, lleva 16 años metíu n’empreses rellacionaes col turismu. Yá como músicu viaxara con frecuencia a Tahití, llugar nel que se convirtió nun espertu tocador d’ukelele. Como intérprete llegó a participar tres veces nel Festival de Viña del Mar y tien grabaos tres discos.

D’estos viaxes a Tahití sacó tamién un camín a siguir na diversificación del so negociu. Asina comprobó que los teitos de les cacañes tahitianes parecíen de fueyes de palmera, pero namás lo parecíen porque yeren pieces de plásticos ultrarresistentes o de polietileno d’alta densidá impermeables y que nun salen esnalando nos díes ventosos como los teitos ornamentales de fueya.

Contactó a los fabricantes una empresa tahitiana-canadiense llamada Palmex pa instalar esti tipu de teitos na islla de Pascua. De mano colocólos nel so propiu hotel y causó sensación. La fuerte demanda decidiólu a tomar la representación y crear la firma pa distribuyir los teitos rústicos industriales en too Chile (www.palmexsudamerica.cl).

Llama l’atención nes fotografíes que se trata d’un revestimientu asemeyáu al de las cabanas de teitu de Teberga, Somiedo, Cangas y Degaña, y que tan en francu retrocesu en tol norte de Lleón. De la mesma manera qu’en delles partes de Castilla ta recuperándose l’adobe, bien podría tratase d’una manera de recuperar la imaxen de les nuestres brañes ensin necesidá de recurrir a un oficiu, el de teitador, que ta desapareciendo pasu ente pasu.