Venti concursantes amosaron les últimes tendencies de la moda islámica nel certamen Muslimah World, onde se declara la Miss Musulmana y se participa notres actividaes como un campeonatu de recitadores del Corán. El concursu celebróse en Yakarta esta mesma selmana como alternativa al de Miss Mundu, que va tener llugar en Bali y que tien llevantao un fuerte oposición nel país.

La ganadora d’esta primera edición resultó ser Obabiby Aishah Ajibola, nixeriana de 21 años, que va recibir como premiu principal un viaxe a La Meca. Esta nixeriana impúsose ente 20 candidatures. Les candidates llevaron al acabu otres actividaes como la citada recitación del Corán, desfiles con velu islámicu y sesiones d’oración. Amás de Nixeria taben representaes nel concursu Irán, Malasia, Brunéi, Bangladesh ya Indonesia. “Somes llibres y el velu ye’l nuestru arguyu”, declaró la ganadora a los medios de comunicación.

Les aspirantes, que namás podíen participar si usaben velu, recibieron un “entrenamientu espiritual” de tres díes, nel que s’upaben de la cama enantes de riscar l’alba pa rezar xuntes y ameyorar los vezos de llectura del Corán. L’obxetivu de los organizadores del concursu yera amosar qu’esiste una alternativa a la idea de la belleza propuesta pol certamen Miss Mundu.

Con too, anque los organizadores d’esti concursu afirmaran que la belleza nun tenía de ser únicamente física, el pesu y les midides de les concursantes taben espuestos na páxina web del certamen, patrocináu por una marca de maquillaxe “halal”. Tien de tenese en cuenta que’l concursu Miss Mundu 2013, que taba previstu pa cellebrar el 28 de septiembre en Yakarta, treslladóse qa Bali, islla hinduista d’Indonesia, tres de numberoses manifestaciones contra esti certamen.