Por Ismael G. Arias.- Según l’Asociación d’Hoteles de la Ciudá de México, de los cerca de 1000 hoteles de la ciudá, el 65% son “hoteles de paso” y el restu “hoteles de hospedaje”. Hai una sutil diferencia ente los términos “paso” y “hospedaje”, yá que los primeros puen contratase por hores y tan destinaos preferentemente a práctiques sexuales, ensin ser dafecho un prostíbulu.

Polos datos de la citada Asociación alviértese que’l 90% d’estos “hoteles de paso” tan nes manes de families descendientes d’asturianos y gallegos, dos de les colonies más numberoses nel país. Trátase de negocios que pasaron de padres a fíos y a ñetos y bien d’ellos fueron evolucionando dende’l “hotel de paso” al “hotel de hospedaje”. Como comentariu adicional a estos datos hoteleros señálase que la Encuesta Global sobre Hábitos Sexuales indica que los méxicanos mantienen una media de 2,03 alcuentros sexuales a la selmana, lo que los lleva a tar los segundo nel ránking mundial, malapenes per debaxo de los portugueses con 2,05 veces.

Les distintes riestres d’emigrantes españoles siempre toparon la forma de facer negociu en México. Asina les coses, bien d’ellos diéronse cuenta aína que los mexicanos requeríen d’espacios íntimos pa satisfacer les sos necesidaes erótiques, pol fechu de ser enforma infideles. Asina fueron abriendo nes primeres décades del sieglu pasáu una serie d’hoteles y fondes que derivaron nel conceptu de “hoteles de paso” o moteles de curtia estancia.

Estos emprendedores asturianos y gallegos de primeros de sieglu descubrieron, tamién, que yera descomada la cantidá de población que se treslladaba dende los alredores a DF, llegaben con malapenes equipaxe y necesitaben un cuartu namás por unes hores. Asina que pa cubrir dambes circunstacies inventaron el conceptu de “hoteles de paso”.

Pue alcontrase información xeneral sobre estos establecimientos en www.guiahotelesdepaso.com o directamente teclear en Google el nome de dalgún de los más reputaos, como’l Love V Motel Boutique México DF pa comprobar de primera mano los sos servicios y les sos ufiertes. Nadie escuende la so principal dedicación yá que nellos s’invita abiertamente a les pareyes a tener relaciones n’amplios, cómodos y divertíos cuartos, nos que pue haber dende una piscina hasta una pista pa bailles sensuales y onde se puen facer hasta grupos de 8 persones. Too ello envuelto nuna atmósfera sexual na que los clientes puen algamar, dientro del preciu concertáu, xuguetes sexuales, disfraces atrevíos y comida y bebida afrodisíaques.

Tamién la mesma publicidá indica qu’estos moteles van destinaos non solo a amantes sinon tamién a matrimonios que quieren disfrutar d’un ratu d’intimidá, ensin la posibilidá de ser interrumpíos polos sos fíos y poder s’esplayar ensin ser sentíos polos vecinos. Asina, homes y muyeres que visitaron estes instalaciones nun lo escuenden sinon que farden d’ello nes redes sociales, polo que dir a un motel ta pasando nos últimos años de ser un tema de vergoña a ún de presunción.