Rio de Janeiro.-La nueche primera destacóse pola presentación de Beyoncé, que cantó delantre d’ochenta mil persones axuntaes na Ciudá del Rock, en Río de Janeiro, Brasil, con motivu del macro festival Rock and Río.

La intérprete estadounidense ufrió un espectáculu intensu y entusiasta, enllenu de sensualidá y enerxía, na llinia de los grandes conciertos qu’ella vien dando nos últimos años y a los que tien tan avezaos a los sos incondicionales. Nuna xornada que tamién incliuyó un espectáculu del pinchadiscos francés David Guetta.

Anque nel sábadu presentárase bandes de rock, nel sentíu más averáu a lo que ye’l rock tradicional, como The Offspring, Muse y Thirty Seconds to Mars, la sengunda nueche vibróse al ritmu del pop con ún de los platos fuertes más esperáu polos asistentes, el cantantes nortamericanu Justin Timberlake.

El tamién actor llevó al deliriu a alredor de ochenta y cinco mil persones nel día más mozu del festival, con un predominiu descomanáu de xóvenes adolescentes, y nel que tamién cantaron la estadounidense Alicia Keys y la británica Jessie J. Vistíu con camisa blanca con detallinos en negro, un sombreru caláu, zapatos de claqué y cásique siempre escoltáu por dellos baillarinos, Timberlake ufrió un conciertu atacáu de les sos canciones más romántiques, nel que s’entregó dafecho del empiezu al acabu, amosando en bien de momentos la so habilidá col piano.

Con toes estes actuaciones y l’enorme númberu de xente asistente a los conciertos, la edsición d’esti añu del festival Rock and Río conviértese nel marcu del trunfu del pop sobre’l resto d’ufiertes musicales. Dalgo que se vino comprobando estos últimos años nos festivales europeos y americanos.