Al españíu de les protestes na primavera de 2011 en Siria, respondióse col llanzamientu d’una campaña que facía por desacreditar la visiónoficial de la revuelta. La obtención de visaos pa los peiodistes foranos resultó cada día más difícil y bien d’ellos que yá taben en Siria fueron intimidaos pa obligalos a salir del país.

L’informe 2013 d’Amnistía Internacional conclúi que Siria ye anguañu’l país más mortal del mundu pa los periodistes, tanto pa los profesionales de los medios de comunicación como pa los nomaos “periodistes ciudadanos”, aquellos qu’al traviés de les redes sociales son decisivos a la hora de dar a conocer lo que ta ocurriendo nel país.

El llugar que nun  yeren quién a ocupar los periodistes profesionales fue ocupáu por dichos “periodistes ciudadanos”, lo que los convirtió nun obxetivu principal pa la represión. L’exemplu que da Amanistía Internacional ye’l d’Abd al Ghani Kaake que namás tenía 18 años cuando morrió tres de recibir disparos de les Fuerces de Seguridá nel lloombu y nel cuellu demiestres filmaba una protesta n’Alepo.

Dellos grupos armaos d’oposición, según sigue informando Amnistía Internacional, atentaron contra los mesmos derechos polos que dicíen lluchar, incluyíu’l derechu de los periodistes a espresar les sos opiniones y a informar de lo que ven ensin llerza a sufrir represalies.

Estes fuerces opositores llegaron a utilizar les sos páxines nos medios sociales pa identificar a periodistes qu’al so xuiciu son pro gubernamentales, catalóguenlos como “medios shabiha” (términu que designa a les fuerces paramilitares non gubernamentales, bien conocíes pola so brutalidá), profieren amenaces contra ellos y celebren o atribúyense la so muerte.

Asina, la gran mayoría de les persones que morrieron informando de la guerra –al menos 46, según un informe de la UNESCO de primeros de 2013- yeren siries. Delles morrieren al quedar atrapaos en bombardeos o tiroteos, pero cúidase qu’al menos 36 matáronles adrede fuerces del gobiernu o de la opoción por mor del so trabayu.