La portavoz de la Comisión Europea, Pia Ahrenkilde, alvertía nel día d’ayeri  que los trataos eurpeos imponíen que si un estáu intracomunitariu declaraba la so independencia automáticamente dexaría de pertenecer a la Unión Europea y convertiríase nun país terceru. Idéntiques palabres a les que pronuciara’l comisariu de Competencia Europea, Joaquín Alunia, cuando indicaba que la parte segregada nun ye miembru de la UE.

La portavocía de la Comisión Europea, nesti casu, non solo ta alvirtiendo a Cataluña, sinon a la llarga riestra de países dientro d’estaos comunitarios que planteen la so independencia, col firme propósitu de siguir perteneciendo a la Unión Europea y permanecer dientro del ámbitu del euru. Son los casos de Baviera, dientro d’Alemaña, d’Escocia, dientro de Gran Bretaña, de Córcega, dientro de Francia, como de Cataluña, dientro d’España. Modelos d’independencia que cuenten col apoyu, como tamién se vien viendo estos díes, d’otros países comunitarios, como Lituania, Letonia y Estonia, que nun va tanto segregáranse de Rusia y que reivindiquen el mesmu derechu pal restu de países y nes sos mesmes condiciones. Tan reciente como’l casu de la segregación d’Eslovaquia de l’antigua Checoslovaquia, cuando non de la moderna creación de países como Croacia, acabante d’entrar na UE.

Ante esti panorama de proyectos de futures independencies, la Comisión Europea alvierte qu’un estáu segregáu perdería años en trámites pa reingresar na UE, tornaríen los sos ciudadanos al empléu del pasaporte, como les empreses a los aranceles, amás de quedar el nuevu país en xeneral nuna especia de limbu monetariu. Un panorama que, cuenten los responsables de los países qu’impulsen la segregación de los estaos de los que formen parte, va dir despexándose pasu ente pasu, yá que la independencia planteada dientro del marcu de la llegalidá –como ye’l casu de la que plantea Escocia- vien recoyida dientro de la propia llexislación de la UE.