“Carancafunfa se hizo al mar con tu bandera…”, canta l’escritor arxentino Jorge Luis Borges entonando’l tangu “El choclo”. Depués, falando na grabació,, recuerda a l’audiencia que remembra una lletra vieya del cantar que nun ye quién a repitir pa nun ofender al ayente. Aludía asina a una de les lletres orixinales del clásicu tangu que tenía, como tantos otros, tema prostibulariu.

La voz suena matada, pola escasa calidá del rexistru y pol ruíu del tráficu. Pregúnta-y l’entrevistador sobre’l significáu de “carancanfunfa” y respónde-y Borges que refier al estáu d’ánimu d’un home que se siente asina.

El descubrimientu diólu a conocer l’escritor Bernardo Atxaga, quien recibiera en 2002 unes cintes del so amigu, José Manuel Goikoetxea, emigráu a Buenos Aires, y que-y entregara un emigrante gallegu, Manuel Román Rivas, n’agradecimientu por tenelu agospiáu na so casa.

Diez años más tarde, Atxaga conoció al biógrafu de Borges, Edwin Williamson, que s’interesó aína pol material. Trátase de la grabación d’unes conferencies que Borges pronunciara en 1965. La noticia recoyérala’l diariu La Nación de la época, pero enxamás s’alcontraran rastros de les charres, en total cinco hores de valioses reflexones y anécdotes sobre’l tangu.

En 2012 Bernardo Atxaga entregó les cintes al director de la Casa del Lector, César Antonio Molina. Nelles se recueye información sobre l’oríxenes del tangu, nos alredores de 1880, según opinión de Borges. Un movimientu musical que surde de les cases de mala reputación de los barrios probes de la ciudá.