Uviéu.- Entamaron los conciertos de San Matéu nel nuevu recintu acondicionáu de La Ería. El públicu presente nesti primer conciertu destacó la necesidá que tenía Uviéu d’un espaciu d’estes característiques pa conciertos, por más que la más grande parte de les crítiques procedió de les deficiencies del soníu.

El primeru de los conciertos programaos nesti espaciu mateín contó cola presencia de los asturianos Queen Bitch, los castellanos Celtas Cortos y el catalán Loquillo. La formación asturiana comenzó l’andar como un tríu de rock and roll, afitando los sos raigaños na música de los años setenta, tanto inglesa como americana. El bien conocíu grupu vallisoletanu Celtas Cortos llegaba a Uviéu depués del enorme éxitu de la grabación del so videoclip en Quirós. Y, como cierre, Loquillo trayía a San Matéu’l so repertoriu más conocíu y el que tenía bien de ganes de sentir los sos incondicionales.

Del espaciu acondicionáu na Ería dizse que sedría quién a agospiar a venti mil espectadores. A esti primer conciertu asistieron siete mil y, a pesar de delles quexes, el públicu tenía ganes de fiestes y disfrutó. Les crítiques centráronse principalmente nes deficiencies acústiques, lo que per otra parte acaba siendo dalgo bastante normal nesti tipu de recintos pa grandes eventos musicales. Con too, ye cierto, el soníu yera enforma meyor que’l que s’aveza dar notros recintos festivaleros asturianos, como los estadios de fútbol o los polideportivos usaos notres fiestes d’Asturies.

FOTO: web de Queen Bitch