Mieres del Camín.- Una rápida intervención d’una brigada minera integrada por seis trabayadores mató l’incendiu qu’obligara a salir al relevu de la tarde del vienres nel pozu San Nicolás de Mieres. Nesti pozu, conocíu popularmente como pozu Nicolasa, trabayaben nesti momentu mui pocos mineros por mor de la güelga convocada por Comisiones Obreres unos díes enantes.

Sofocáu l’incendiu, comprobóse que les llames nun afectaran más qu’a dellos elementos mínimos de la maquinaria. La capa de carbón que se vien esplotando dende séptima planta nun se viera afectada en nengún momentu, informa la empresa. A pesar de la densidá del fumu producíu pol incendiu, los mineros de la brigada averaron al llugar del sucesu ensin nenesidá d’empléu de los sistemes de respiración artificial.

Demientres la dirección d’Hunosa continúa coles investigaciones correspondientes pa establecer los oríxenes del incendiu, los relevos previstos pa esti fin de selmana tan trabayando lo que lleva a pensar na recuperación de la normalidá pa los relevos del llunes.

Esti pequeñu incidente tuvo llugar nel mesmu pozu nel que va quince años, el 1 de septiembre de 1995, perdieron la vida nuna esplosión 14 mineros, 4 d’ellos checos pertenecientes a una subcontrata. Namás dos mineros que trabayaben daquella na galería sobrevivieran a la que fuera la traxedia más grave de la minería asturiana del últimu mediu sieglu.