Asturies.-N’AST quier amosar públicamente la so refuga al anteproyeutu de Llei d’Atención Integral en Materia de Drogues del Principáu d’Asturies por consideralu un nuevu ataque a la cultura asturiana, concretamente a la cultura de la sidra y del vinu’l país o de la Tierra de Cangas, principalmente no que cinca a la prohibición de tomar tanto una comu otru hasta los 18 años ensin tener en cuenta los condicionamientos culturales que xiren al rodiu’l so consumu.

Asina, pa N’AST afitar multes de 600 € por apurrí-y un culete a un menor d’edá o torgar la  entrada nun llagar ensin l’acompañamientu d’una persona adulta son midides ridícules, propuestes ensin xacíu dengún y escaeciendo dafechu tola cultura qu’hai alredior de la sidra y el vinu’l país nes sos fasteres de producción, asina comu’l fechu de que son munchos los asturianos y asturianes que tienen llagar propiu en casa y que  “mamen” esta cultura dende bien neños, participando en toles fases del procesu d’ellaboración de la bébora, ensin que por ello tengan qu’acabar siendo alcohólicos.

Amás, dende N’AST nun entendemos por qué dende’l “Principáu” tan empeñaos en sometese a les directrices del Gobiernu estatal al recoyer la prohibición del consumu d’alcohol a los menores de 18 años, en llugar d’a los 16 comu fasta agora yera precepti¬vo nel nuesu país, porque los resultaos oxetivos de la llexislación asturiana fasta agora esistente son munchu meyores que los algamaos pola llexislación española a la qu’agora quier plegase’l “Principado”.

En N’AST tamos convencíos de que les cultures asturianes de la sidra (esa pa la que’l “Principáu” diz que va solicitar la reconocencia comu Patrimoniu Inmaterial de la Humanidá pola UNESCO) y del vinu’l país permiten un averamientu paulatinu, gradual, moderáu y socializáu al consumu d’alcohol y que la rellación de la nuesa mocedá col alcohol seya más racional y menos conflictiva que la de los sos homólogos españoles, que nun tienen esta cultura y que carecen una llexislación prohibicionista qu’a la vista de los resultaos nun resulta efeutiva.

Ello asina, dende N’AST perafitámosmos na defensa de la cultura asturiana d’educar, frente al viciu español de prohibir, y reclamamos al “Principáu” que de siguir p’alantre con esta Llei se recueya polo menos un tratu diferenciáu de tala miente que siga permitiéndose’l consumu de sidra y vinu’l país de magar los 16 años y que nun se penalicen aquelles cuestiones qu’hasta agora se permitíen.

FOTO: Isabel Permuy