Manuel González Orviz mira les semeyes de la quesería de Dorita Díaz Posada -sumida tres el frayatu de la canal d'Eón, al pie de Marín González, l'otru queseru afectáu

El coordinador d'IX Manuel González Orviz, reclamó güei una solución urxente pa los afectaos pol frayatu de la canal de la compañía Eon, n'Arenas de Cabrales, qu'inda nun fueron indemnizaos pola empresa, a pesar de que la traxedia produxose hai yá un añu. El máximu responsable de la formación esplicó, en entrevistándose esta mañana colos propietarios de les queseríes n'Arenas de Cabrales, que nun se trata namái d'un problema particular de los dos empreses artesanales afectaes, sinón qu'afecta a tol sector queseru d'Asturies, yá que repercutió na capacidá de producción de quesu cabrales.

“A un añu de la traxedia, Eon tien les responsabilidaes derivaes d'esta traxedia. Equí teníamos dos queseríes que al día de güei nun pueden desenvolver la so actividá porque nun  recibieron les indemnizaciones correspondientes. Lo qu'apura ye la puesta en funcionamientu de los dos queseríes y que se produza un alcuerdu. Hai que tener en cuenta qu'equí nun son tres empreses les que tán aldericando les indemnizaciones, sinón dos productores artesanales y una gran empresa. Ye una cuestión que podríamos dicir de David  contra Goliath”, aseguró.

Pal coordinador d'IX ye fundamental, nestos momentos, que se desenvuelva una política activa pa dinamizar el sector agroganadero. “El mediu rural, si nun somos conscientes, o tomamos midíes, muerrenos ente les manos”. Manuel González Orviz punxo como exemplu la producción del cabrales. “Tamos nuna zona onde'l Principáu tien que curiar lo que ye la distribución del conxuntu de los quesos y dar cobertoria a los productores. Entendemos que nuna situación difícil como esta, equí, el mercáu, la iniciativa privada, les entidaes financieres nun van dar cobertoria económica a productores. Tolo contrario, van tirase contra ellos, nel cumplimientu de los plazos, obligaciones que tienen contraíes coles entidaes financieres y el Principáu tien que xugar un papel de garantizar el caltenimientu de l'actividá, ayudar a que pasen esta travesía del desiertu porque tenemos siquier 30 productores de cabrales consolidaos y nun podemos dexar qu'esti procesu lleve a nengún per delantre”.

Manuel González Orviz dixo que'l Principáu d'Asturies nun puede ser un espectador pasivu yá que tien una responsabilidá especial na dinamización del sector. “Según nel so momentu entendimos que la minería ye una cuestión bien importante pa les contornes mineres y que ye responsabilidá del Gobiernu (d'España),entendemos que la producción quesera, y non solo del cabrales, ye una competencia en parte importante del Principáu y amás fundamental pal desenvolvimientu económicu d'esta zona. El cabrales ye la cabeza tractora de la zona, pero tamién de los quesos”.

El coordinador d'IX amosóse críticu cola Alministración Autonómica yá que, dixo, “nun ta siendo sensible y nun ta dando les garantíes, que nun son palabres, nin discursos, sinón recursos, les garantíes económiques, los avales, que puedan precisar tantu productores como nesti casu los mesmos distribuidores”.

González Orviz reclamó amás el desenvolvimientu d'un plan forestal n'Asturies que ponga n'usu terrenales güei esbardiaos na so esplotación y que tienen de ser una pieza clave pa rellanzar la economía de les árees rurales asturianes.

Como tercer elementu necesariu na articulación del campu asturiano con capacidá p'afitar población, el líder d'IX, refiriose a la necesidá de potenciar el sector ganaderu. “Hai que facer un esfuerzu importante en garantizar les nueves incorporaciones”. Al pie de ello ha plantegase una acción que dea respuesta a los retos de les ayudes de la Política Agraria Común (PAC). “Ende apautemos col Partíu Socialista una posición na que se prime la producción sobre la estensión territorial y esa filosofía ye la que tenemos que llevar tamién a lo que ye'l desenvolvimientu de too lo que ye'l procesu ganaderu. Solo con actividá económica podemos garantizar la permanencia de población”, afirmó González Orviz. Y ye que, según el coordinador d'Izquierda Xunida, “la fixación de la población desenvuelvese cola actividá económica. Si nun hai actividá económica, la xente nun se va quedar. Si la xente nun se queda, nun hai servicios y eso ye una pescadilla que se muerde la cola y que va faer que muncha xente tenga que salir d'equí”.

Nun tomar midíes agora supondría abandonar al campu asturiano: “L'alternativa a lo que tenemos güei nel campu asturiano nun pueden ser nin les carbes nin los jabalíes. Poro, l'alternativa tien que ser que se quede la xente que ta desenvolviendo esa actividá y que collaboró de forma decisiva al caltenimientu del mediu rural y de los valores ambientales que tien el conxuntu de la zona rural asturiana”.

Pela so parte, los propietarios de los dos queseríes que sumieron tres la rotura de la canal d'Eon reclamaron que la compañía desbloquee yá les sos indemnizaciones coles mires de poder volver a entamar l'actividá. Tantu Dorita Díaz Posada, como Marino González, manifestaron el so malestar porque, un añu dempués, la empresa eléctrica inda nun pagara. Esti dineru, según esplicaron, ye fundamental pa empecipiar la producción de quesu yá que, nel primer casu, les sos instalaciones sumieron afaraes pola rotura de la canal y, nel segundu, les queseríes van tener que baltase de mano de cero