Una vuelta más el sucursalismu reinal del “Principado” ocasionará daños inreparables a la cultura de la sidre y la economía asturiana.
Desixe un tratamientu diferenciáu pa la sidre que siga permitiendo’l so consumu dende los 16 años.

Escontra toa llóxica, l’anteproyeutu de ley d’Atención Integral en Materia de Drogues del “Principado” sométese a les directrices del Gobiernu central y recueye la prohibición del consumu d’alcol a los menores de 18 años, en llugar d’a los 16 comu fasta agora yera preceptivo nel nuesu país.
Y decimos escontra toa llóxica, porque los resultaos oxetivos de la llexislación asturiana fasta agora esistente son munchu meyores que los algamaos pola llexislación española a la qu’agora quier plegase dende’l “Principado”, talo comu queda espeyao na encuesta estatal “Edades 2011” na que se conclúi que los menores asturianos tienen un consumu más moderáu d’alcol que los españoles de la so mesma edá. Si la llexislación asturiana fasta agora esistente, que respetaba la nuesa cultura ya identidá, algamaba meyores resultaos ¿Por qué sometemos a la llexislación prohibicionista española que los tien piores?.

Nun hai d’escaecer, que ye la cultura asturiana de la sidre (esa pa la que’l “Principado” diz que va solicitar la reconocencia comu Padremuñu Imaterial de la Humanidá pola UNESCO) ye la que permite un averamientu paulatinu, gradual, moderáu y socializáu al consumu d’alcol y la que permite que la rellación de la nuesa mocedá col alcol seya más racional y más conflictiva que los sos homólogos españoles, que cadecen de dicha cultura y que carecen una llexislación prohibicionista qu’a la vista de los resultaos nun resulta efeutiva.
Por supuestu, l’aplicación de la llexislación española n’Asturies, supondrá un duru golpe a la cultura sidrera asturiana, pero tamién a la nuesa economía, darréu qu’alloñar a la mocedá d’esi grupu d’edá del consumu de sidre implica una perda importante de consumidores pola franceura de la dinámica cultural y socializadora de la sidre y la so desviación haza otru tipu de consumu comu’l “botellón”.

Ello asina, dende LA SIDRA perafitámosmos na defensa de la cultura asturiana d’educar, frente al viciu español de prohibir, y reclamamos al “Principado” un mínimu de dignidá y si nun-yos ye posible, un respetu afayaizu a a la nues cultura sidrera, de tala miente que siga permitiéndose’l consumu de sidre de magar los 16 años.

LA SIDRA. Fundación Asturies XX