Asturies.-El coordinador d'IX, Manuel González Orviz, calificó güei d'acosu y persecución a los fumadores les nueves normes que pretende impulsar el Principáu d'Asturies y que van llindar n'espacios abiertos, pero cubiertos, el consumu. “Una atención específica merez el tabacu, onde se ta produciendo yá una auténtica persecución de los fumadores, nel sentíu de que nun tien demasiáu sentíu'l penalizar el consumu responsable del tabacu en determinaos espacios abiertos. Y yo nun fumo, pero paezme yá una táctica d'acosu, cuando tenemos otres cuestiones que medioambientalmente faen muncho más estropio qu'el mesmu consumu de tabacu”.

El máximu responsable de la formación amosóse, sicasí, conforme cola elevación de la edá mínima pal consumu d'alcohol n'Asturies a los 18 años yá que, dixo, ye daqué lóxicu, cuidando que supon l'adecuación de la norma asturiana a la lexislación qu'opera nel restu del Estáu.  “La elevación de la edá de consumu d'alcohol lo que fai ye armonizar col restu de les Comunidaes Autónomes y paezme correctu, siempres y cuando se faigan procesos educativos que faigan ver y averen a los mozos a un consumu responsable de la totalidá de los productos a los cualos van tener algame, ente ellos el tabacu y l'alcohol”.