Compromisu por Asturias manifiesta la so oposición a l'apertura de nueves  mines a cielu abiertu nes Contornes Mineres asturianes, y llama  a la constitución d'un frente políticu, social, sindical y medioambiental,  que xunte a tolos  sectores de la sociedá de les cuenques y de Asturies que refuguen  les pretensiones d'HUNOSA de rellanzar de nuevu les mines a cielu abiertu.

El pasáu 2 d'agostu Compromisu por Asturies  presentó sendes allegacioness a los Estudios Preliminares d'Impactu Medioambiental venceyaos a los Proyectos d'Investigaciones Complementaries; San Juan, Los Artos, Pontones y Esperanza.  Nelles denunciabense una serie de grave defectos ya illegalidaes que xeneren una indefensión manifiesta a toos aquellos que, como nel nuesu casu, trataren de personase con  cuenta de poder presentar  allegamientos a estos EPIAS, de tal manera qu'esta situación d'indefensión ye, sol nuesu puntu de vista, causa     de nulidá del procedimientu empecipiáu y asina se lo tresllademos   a la Dirección Xeneral De Mines.

Plantegar el futuru d'HUNOSA sobre la base de l'apertura de nueves esplotaciones a cielu abiertu nes  cuenques del  Nalón y del Caudal nun dexa de ser una maniobra política que trata de despintar la realidá d'un fracasu empresarial monumental, el de les sociedaes creaes pa la diversificación de la empresa (SADIM, SODECO) y con elles la reindustrialización de les cuenques minere,  llarada d'empreses y proyectos fallíos, amás de tratar d´ocultar la posible decisión del zarru de la mesma HUNOSA polos actuales directivos  de la SEPI.

A esta situación vien sumase la decisión del PP d'acelerar el zarru de les esplotaciones mineres del carbón d'interior anunciando un plan de zarru que supón una verdadera espada de Damocles  sobre'l futuru de los trabayadores  y unes  perspectives más que negres sobre les mesmes contornes mineres, con  unes cicateres midíes sociales y de reactivación económica que, al pie de los incumplimientos del anterior Plan del Carbón polos entós gobernantes  y los  retayos derivaos  de la salida a la crisis actual, faen que'l panorama de les nueses contornes mineres sía realmente dramáticu.

Nesti contestu, pretender rellanzar de nuevu les esplotaciones mineres a cielu abiertu  resulta un chantaxe inaceptable. Ufiertar esta alternativa a cambéu del zarru de los pozos esistentes y de la paralización definitiva de polítiques de reactivación traería como resultáu un gran deterioru medioambiental d'unos espacios con escasa degradación qu'entá caltienen una gran riqueza natural, una gran amenorga de puestos de trabayu y una hipoteca pal futuru. Tou esto siempres  y cuando nun teamos ante una operación de simple coartada pa consiguir el zarru de los pozos mineros col mínimu d'oposición social posible.