El coordinador federal d'Izquierda Xunida, Cayo Lara, aseguró en respuesta a los periodistes nos pasiellos del Congresu que si ente les razones que llevaron al presidente de la Xunta d'Andalucía, José Antonio Griñán, a anunciar el so arrenunciu a esti cargu “hai daqué que tenga que ver cola Xusticia (en referencia al casu de los ERE) ten de ser la Xusticia la que lo determine”.
Lara fixo esta valoración a la entrada a la xunta de la Diputación Permanente que güei alderica los pidimientos de la oposición, ente elles la d'IX, ICV-EUiA, CHA, pa que'l presidente del Gobiernu, Mariano Rajoy, compareza nel Congresu pa esplicar les imputaciones que s'investiguen na Audiencia Nacional sobre'l financiamientu illegal del PP y otros supuestos delitos.
El máximu responsable d'IX señaló tamién que respeta les razones remanaes por Griñán nel anunciu públicu de la so dimisión d'esta mañana. “Él alegó razones personales que yo respeto fondamente”, resumió.
