El Gobiernu tarda más de tres meses en responder a les entrugues sobre les infraestructures asturianes realizaes por Gaspar Llamazares y enriba nun contesta a más de la metá o apurre información yá conocida. El diputáu asturianu denuncia que'l Gobiernu del PP refuga'l compromisu sobre'l calendariu de les infraestructures de lo que se deduz “que nun hai compromisu políticu nin presupuestariu del Gobiernu en relación a les principales temes qu'afecten a la conexón d'Asturies tantu col pandu como cola autovía del Cantábricu”.

Nada diz l'executivu de Mariano Echo per cuándo se van terminar los tramos Llión-La Robla, fundamental pa la conexón y l'acurtiamientu de los tiempos hasta Madrid, nada tampoco del tramu La Pola L.lena-Xixón. Calló sobre cuándo tán previstos los accesos al puertu d'El Musel o sobre si cumplirán los plazos previstos al respective de l'autovía del Cantábricu. El diputáu asturianu preguntaba si van terminar en 2014, 2015 o más y el Gobiernu nun dedica nin una sola lletra a los plazos, salvu pa dicir que'l tramu Unquera-Llanes “atopase n'execución”.

Del papel que-y atribúi'l Gobiernu a Feve nel tresporte de cercaníes y na conexón Esti Oeste d'Asturies, el Ministeriu nun opina, como tampoco lo fai al respective de la conexón colos puertos tantu per carretera como por ferrocarril, nin de l'ampliación del metrotren a Cabueñes.

Ausencia significativa, contra'l mandatu de la Proposición Non de Llei aprobada na Xunta Xeneral, ye la del calendariu detalláu qu'incluya toles obres, plazos concretos de llicitación y d'execución.

“Dempués de tres meses de plazu pa llograr respuestes a la situación de les infraestructures el Gobiernu nun concreta nada y caltienen toles incógnites al respective de les principales obres d'infraestructures comprometíes n'Asturies”, alvierte'l diputáu asturianu.