Uviéu.-Gaspar Llamazares, diputáu d'IX d'Asturies, rexistró una batería d'entrugues al Gobiernu de Mariano Rajoy sobre la posible sanción al sector naval español per parte de la Unión Europea. El diputáu demanda que'l Gobiernu adopte midíes “decidíes y actives” non solo pa que les ayudes nun tengan que ser devueltes sinón pa garantizar tamién “el presente y el futuru del sector naval que ta en peligru nel nuesu país”. El diputáu asturianu sostien que tien la sensación de qu'ésti Gobiernu s'apuntase siempres a la teoría del caos”, esto ye, a llevar les situaciones a la llende pa depués refugar les sos responsabilidaes y buscar culpables.

“Nun queremos qu'eso asoceda nel sector naval, porque yá asocedió nel sector mineru”, afirma'l diputáu, de la que recuerda qu'IX sofita al Gobierno ante la Comisión Europea, pero apunta que “inda son munches les coses que tien que faer”.

En primer llugar tien de rectificar la “alarmante pasividá” qu'amosó mientres los últimos meses nos que los diputaos fueron plantegando la urxencia de sustituyir el mecanismu de financiamientu mientra “el Gobiernu miró pa otru llau”.

El diputáu asturianu pregunta qué midíes urxentes tomó o piensa tomar el Gobiernu pa que la Comisión Europea reconsidere la propuesta avanzada pola Dirección Xeneral de la competencia de devolución de les ayudes del tax lease, si piensa actuar en llínea cola Proposición non de Llei suscrita'l 2 de xunetu de 2013 nel Congresu por tolos grupos y cola declaración institucional adoptada'l 1 de xunetu pol Ministeriu d'Industria, los gobiernu autonómicos d'Asturies, Galicia y País Vascu y la patronal de Pequeños y Medianos Estelleros en Reconversión (Pymar).

Llamazares sostien que les ayudes fiscales a los estelleros españoles cuntaron nel so día cola aprobación del Gobiernu español, y por eso pregunta si ¿tien previstu faer frente a la responsabilidá subsidiaria del Estáu nel casu de que la Comisión Europea esixa finalmente la devolución de les ayudes?

Asina tamién pregunta por qué'l Gobiernu entá nun impugnó les ayudes concedíes a los estelleros holandeses y si piensa'l Gobiernu proponer nel senu de la Unión Europea un sistema uniforme de financiamientu de la construcción naval qu'evite la guerra comercial ente los estaos miembros y promueva l'emplegu.